Shillong ïaïong: Ka Christ Church Morning School ka ba don ha Mawlai Syllai kariah ha ka sngi Palei ka 21 tarik mynta u bnai ka la rakhe bad plie pyrda ïa ka jingdap 25 snem ka jong ka, ka Jubili Rupa kaba ki la pynlong ha hall jong ka skul.
Ïa katei ka jingrakhe ha katei ka sngi la khap ribon plie da u MLA ka Mawlai Konstitwensi u Bah Process T Sawkmie kum u kongsan bad ha kane ka juh ka sngi u la pynbna ruh ban ai jingïarap 5 lak tyngka na ka MLA skhim jong na ka bynta ka jingtei pynheh ïa ka skul, nalor ka 1 lak tyngka kaba u la ai na ka bynta ka jing pynlong ïa ka jingrakhe.
Kane ka jingpynbna ai jingïarap ka la urlong hadien ka jingkyrpad jong u president ka managing committee u bah Alexander Syiem sha u MLA.Ha kane ka sngi rakhe la don ryngkat ruh u Headmaster ka Morning School u Bah Blanstar Lyngdoh, president ka Managing committee, bah A. Syiem, secretar bah S Basaiamoit, ki nonghikai, khynnah skul bad kiwei kiwei.
Ki bor pyniaid jong kane ka skul step ki la ïathuh ba kane ka dei ka skul step ba la seng kyrpang na ka bynta kiba duk bad kiba bylla, ba la seng ha ka 15 tarik u Lber, 1997 bad i (L) kong Locket Mylliempdah i la long i headmistress banyng-kong jong kane ka skul.
Na ka liang u Bah PT Sawkmie ha ba aijingkren ha kane ka sngi u la pynpaw ba ki long kiba donbok ban ïoh rakhe ïa ka jingdap 25 bad ka jingïaid lynti jong u mawmer ba 25 snem kam dei kaba lyngkot, hynrei kaba jngai bha bad u ngeit ba ki la ïaid ryngkat bad bun ki mawjynthud.
Ha kane ka juh ka sngi u MLA u la ai ruh ïa ka song Pisa sha ki 26 ngut ki nonghikai na ka bynta ka jingdonkam jong ki.
Na ka liang ka kong P. Lyngdoh kaba la ai jingkren ha kane ka sngi ka pynpaw ïa ka jingkmen ba ka la shah khot sngewbha ha kane ka skul kum ka nonghikai kaba rim. Kaba la ïathuh ba ha por ba hikai ma ka hapoh i (L) kong Locket ka la ïoh tulop tang 200 tyngka.
Ka la ïathuh ruh hadien kane u Bah PT Sawkmie u la pynïoh kam ïa ka, ka la trei nyngkong kum ka casual bad ka pyntip sha u MLA da ka jingkmen ba mynta dangshen ka la kiew kyrdan kum ka LDA.
Ha kane ka sngi la ïoh ruh ïa ka jingkren na u headmaster bah Blanstar Lyngdoh, Bah Alex Syiem, ka Kong Felicia Sun ïa ki kyntien ai khublei bad kiwei kiwei. La pyniphuh iphieng ruh ïa kane ka sngi da ka jingrwai na ki khynnah skul bad da ka jingpyni ïa ka khana lyngkot halor ka jingïaid lynti ba 25 snem jong ka Morning School.
