Shillong, Nailur, 18: Ka Balang Unitarian, ha Meghalaya ha ka sngi Balang ka la rakhe ïa ka jingdap 137 snem jong kane ka Balang ïa kaba la seng da u Babu Hajom Kissor Sing ha u snem 1887 ha rilum Jaiñtia.
Kane ka Balang kaba la tip ruh kum ka niam mane Wei Blei ka la suhthied na Jowai, ter ter ha Laban bad ha Nongthymmai bad sha kiwei ki bynta jong ka jylla, kata ha ka shnong Kharang, ha Puriang, ha Mootyrchiah bad ha Karbi Anglong, Assam.
Mynta u snem, ïa kane ka jingrakhe la pynlong ha kylleng ki ïingmane jong ka Balang Unitarian, hynrei ka jingrakhe kaba kham heh ka dei kaba ju long ha ka Balang Unitarian ha Madan Raid Laban.
Ha kane ka jingrakhe ïa kane ka lyngkhuh snem ha Laban, la sakhi lang da ka Director General of Police (DGP) jong ka jylla Meghalaya ka Kong Idashisha Nongrang kaba la long kum ka kongsan bad ka Deputy Commissioner jong ka East Khasi Hills District ka Kong Rosetta M Kurbah kum ka symbud kongsan ryngkat ka jingïadon lang u MLA ka Shillong South Constituency u Ban Sanbor Shullai bad kiwei kiwei ki nongïalam jong ki kynhun Balang bapher bapher.
Ïa kane ka jingrakhe ha kane ka sngi, la pynïaid da u Bah Teihokson Ranee kum u Moderator da kaba la sdang shwa ïa jingïathang ïa ka sharak bad ka jingduwai lyngkot na ka Samla Pynshisha Mylliemngap bad ka jingkren kyrpang halor kane ka lyngkhuh snem na ka Minister jong ka Unitarian Union of North East India ka samla Alisha Marba Rani, ryngkat ka jingïadon lang kiwei de ki riew pawkhmat jong kane ka Balang ba kynthup ïa u Rev. Derrick P Pariat na ka Balang Unitarian Nongthymmai, Shillong, u Convener jong Anniversary Celebration Committee u Bah RG Marbañiang bad kiwei.
Ha Nongthymmai ïa ka jingrakhe la sdang ïa ka jingïaseng da u Moderator u Bah La-i-Kupar Mylliempdah bad la ai jingkren da u Secretary jong ka Unitarian Church Nongthymai u Bah K.L Nongbri bad la pynshongkun ïa kane ka jingrakhe da ka jingrwai ba kyrpang da ki dkhot jong ka Sunday School Unitarian Church Nongthymmai bad ka Seng Samla Unitarian Church Nongthymmai.
Kum ban shu pyntip hangne, la seng ïa kane ka Balang ha ka 18 tarik, Nailur, 1887. Ka dei ruh ka Balang kaba ha ka por ba la sdang ki don tang khyndiat ngut eh ki riewngeit, hynrei mynta ki riewngeit ki la nang roi ha kylleng ka jylla Meghalaya bad haka jylla Assam.
