Nongpoh, Nailar 02: Ki khynnah skul jong ka Alpha English Higher Secondary School mynta ka sngi kila ioh ban rakhe ïaka sngi kyrpang ban burom ïaki nonghikai (Pre- Teachers’ Day) kaba la ju rakhe ruh ha man la ka 5 tarik jong u Nailur man la u snem kum ka jingrakhe donburom ïaka sngikha jong u khraw pyrkhat ka Ri u Dr. Sarvepalli Radhakrishnan haka jingïalang kaba la long mynta ka sngi ha phyllaw jong katei ka skul.
Ka phang pdeng jong kane ka jingrakhe ka long ‘The Teacher is not a Transmitter of Knowledge but a Guide to the Child’s Own Discovery of the World’
La sakhi ruh ha kane ka prokram ba ki khynnah skul ki la pdiang burom ïa ki nonghikai hashwa ban sdang ka prokram bad la pyniphuh iphieng ruh da ka jingïashimbynta ki khynnah skul naduh kiba rit haduh kiba la san ha ki jingshad jingrwai bad ki prokram bapher bapher bad ka prokram kyrpang bala shim bynta da ki heprit haki jingpyni riam.
Ka Kong W.K Blah Principal jong kane ka skul ka la pynpaw ïa ka jingkmen kaba khraw ba kum ka skul hi kan ïoh ban pyndon burom ïa ki nonghikai kiba dei shisha kita ki rishot bad ki nongthawdur naka bynta ka lawei jong ki khynnah skul kiba long ruh kum ki kmie ki kpa ba ar ha kane ka pyrthei.
Kum ka khlieh duh jong ka skul ka Kong WK Blah ka la ai khublei kyrpang ïa baroh ki nonghikai, ki khynnah pule bad ki kmie ki kpa kiba la lah ban pyniphuh iphieng ïa kane ka jingrakhe bad kum ki nonghikai kin dang ai ka jingshakri kaba bha tam sha ki samla pule naduh ki heprit ha katei ka skul.
