Shillong, Nohprah, 17: Ka All MeSEB Employees Staff Union ha ka sngi Thohdieng ka la rakhe ïa ka jingïaid lynti ïa ki ar phew san tylli ki mawmer lane ka Jubili Rupa naduh ba la seng ïa kane ka kynhun.
Ha kane ka jingrakhe ba la pynlong ha Community Hall, Jaïaw Shyiap & Lum Pyllon, Shillong, ka Union ha ka session kaba nynkong ka la pynkup burom ïa ki nongïalam bad ïa ki dkhot barim ha kaba la sakhi lang da u Chief Managing Director ka Meghalaya Energy Corporation Limited u Sanjay Goyal uba la long kum u Kongsan, nangta u Director Corporate Affairs u Bah Dipsambor Hynniewta, u President u Bah I. Kharkongor, u General Secretary u Bah RR Marbaniang, ki nongïalam jong ka All India Trade Union Congress bad kiwei kiwei.
Ha ka session kaba ar pat la pynlong sa ka jingïalang jong ka Union ba la pynïaid da u Bah G. Dympep ha kaba la ai ïa ka kaiphod treikam da u General Secretary u Bah RR Marbaniang, ka kaiphod na u Treasurer u Bah AJ Warjri bad kiwei kiwei.
