Rakhe ka Akashvani NES, Shillong ïa ka National Broadcasting Day, dap 90 snem ka jingshakri

Shillong, Naitung, 23: Ka Akashvani North Eastern Service (NES) ha ka sngi Balang ka la pynlong ïa ka North East Music Concert ha U Soso Tham Auditorium, Shillong, ban kynmaw burom ïa ka National Broadcasting Day.
Ïa kane ka prokram la plie paidbah da ka Director General jong ka Akashvani, Dr. Pragya Paliwal Gaur ryngkat ka jingskahi lang jong ki kynrem ki lyndan bad ki ophisar na ka All India Radio bad Doordarshan.
Ha kane ka sngi la ïadon lang ruh u Dr. B.D.R. Tiwari, Commissioner & Secretary sha u Lat ka Jylla Meghalaya; u Ashish Bhatnagar, Additional Director General ka AIR & Doordarshan North East; bad ki dkhot rangbah jong ka kynhun pynphriang khubor.
Haba kren ha kane ka sngi, ka Dr. Gaur ka la pynpaw ïa ka jingdonkam jong ka 23 tarik Naitung kum ka sngi ba la sdang ïa ka jingpynbna radio ha India ha u snem 1927. Ka la ong, “Kane ka sngi kam dei tang ka jingrakhe ïa ka pateng ba khraw jong ngi, hynrei ka dei ruh ka jingpynskhem biang ïa ka jingthmu jong ngi na ka bynta ka lawei jong ka jingpynbna paidbah.”
Ka Dr. Gaur ka la ban jur ïa ka rukom treikam ba la pynthymmai jong ka Akashvani ban dang long kaba ïadei bad kaba la pynkhreh na ka bynta ka lawei, da kaba kdew ïa ki sienjam kum ka NewsOnAir mobile app bad ka rynsan OTT ba dang shu sdang shen ka ‘Waves’, kaba ai ïa ki prokram live bad ba la buh jingtip na kylleng ki channel jong ka Akashvani.
Haba kren ïa ki nongrim ba kongsan jong kane ka jaka pynbna khubor, ka Dr. Gaur ka la ong, “Ha ka juk jong ki khubor kiba lyngkot bad ki khubor kiba stet, ka Akashvani ka dang ïai bteng ban long ka nuksa jong ka jingshaniah, bad ka jingai khubor kaba beit bad ryntih.” Ka la bynrap ba ka jingpynbna paidbah ka dang long ka jingkitkhlieh jong ka ri kaba la kit da ka jingsngew sarong bad ka jingaiti lut.
“Ka Radio ka dei ka sur U Blei,” u Mahatma Gandhi u la ong shisien, da kaba ithuh ïa ka bor bym lah ban ïanujor jong ka ban pynïasoh ïa ki briew. Haba pynpaw ïa kane ka jingïohi jngai ha ka National Broadcasting Day, u Ashish Bhatnagar, ADG jong ka Akashvani bad ka Doordarshan, North East Zone, u la ong, “Ka Akashvani bad ka Doordarshan ki dang ïai neh ban pynneh pynsah ïa ka jinglong tynrai jong ka Ri India.” U la ban jur ba ka radio ka la pynkupbor ïa ki briew ha kylleng ka ri India, khamtam ha ka thaiñ Shatei Lammihngi, da kaba pynbna ha ki ktien bapher bapher. Kaba pynlong ïa ka Akashvani kaba kyrpang shisha, u la ong, ka dei ka jingïadei kaba jylliew jong ka bad ki sur tynrai, kaba rah ïa ka mynsiem jong ka ri lyngba ka jingpynbna paidbah kaba kynthup lang ïa baroh bad kaba don ïa ka jingmut na ka bynta ka bha ka miat jong ki paidbah.
Ka bynta ba kongsan jong kane ka prokram ka long ka bynta jong ki jingrwai kiba pyni ïa ka deiriti ba iphuh iphieng jong ki jylla Ashtalakshmi jong ka thaiñ shatei lammihngi jong ka ri India, ha kaba la don ki jingrwai na ki kynhun tem ba pawnam na kane ka thaiñ -Jayanta Jamatia (Tripura), Lungleng Trio (Mizoram), Joe’s Apartment (Sikkim), Rupam & Friends (Assam), Innocent Eyes (Manipur), AR Folk (Arunachal Pradesh), Fifth Note (Nagaland), bad Summersalt (Meghalaya). Kine ki jingrwai ki la khring ïa ki nongpeitkai da ka jingkhleh lang kaba riewspah jong ki jingrwai tynrai bad ki jingrwai ba mynta, kaba rakhe ïa ka jingpher ka deiriti jong ka thaiñ shatei lammihngi.
Haba ïaroh ïa ki nongrwai, ka Dr. Gaur u la ong ba ka thaiñ Shatei Lammihngi ka dei “ka jaka kaba riewspah bha ha ka put ka tem ha India, ha kaba ka jingïatylli ha ka jingpher ka shem ïa ka sur kaba ïar tam lyngba ka jingrwai.”
Ïa kane ka prokram deiriti la pynbeit ban pyni ha ka DD Bharati, ban pyni ïa kane ka jingrakhe sha ki nongpeitkai ha kylleng ka ri.
Haba pynkut ïa ka jingkren jong ka, ka Dr. Gaur ka la ai khublei kyrpang ïa baroh ha ka National Broadcasting Day bad pynpaw ka jingkyrmen ba ka jingïadei jong ka Akashvani bad ki nongsngap ha ka thaiñ shatei lammihngi, khamtam ki samla, kan dang ïai bteng ban nang jylliew.
Ka jingïalang ka la pynpaw ïa ka jingïatylli kaba kyrpang jong ka pateng bad ka juk mynta, kaba pynskhem biang ïa ka bynta ba neh jong ka Akashvani kum ka Sur jong ka ri.