Mawkyrwat, Jymmang 01: Ki nongbylla sngi kiba dei hapoh jong ka South West Khasi Hills District mynta ka sngi ka 1 tarik u Jymmang, 2023 ki la ïoh ban rakhe ïa ka sngi kyrpang jong ki, ba la tip kum ka ‘National Labour Day’ ha ryngkat ka jingïadonlang u President ba rangbah jong ka Hills Farmers Union (HFU), u bah Commander Shangpliang.
Ha kane ka jingrakhe ki nongbylla sngi ki la ïoh ban rakhe da kaba ot ïa u Cake ha ryngkat bad u President ba rangbah jong ka Hills Farmers Union (HFU) ha Shnong Shaid Shaid Umoid South West Khasi Hills District.
Haba kren ha ka jingïalang ba lyngkot, u President ba rangbah jong ka Hills Farmers Union (HFU), u bah Commander Shangpliang u la ong ba kane ka jingrakhe ïa ka sngi ba kyrpang ki nong bylla sngi ka dei ha ka sien kaba nyngkong hapoh ka distrik ha kaba bun na ki nongbylla sngi kim shem la tip wat ïa kane ka sngi ka ba dei ka sngi kyrpang na ka bynta jong ki.
Haba kren pat ha kaba ïa dei bad ki nongrep, u bah Commander Shangpliang u la ong ba ki nongrep hi ki don ka jong ka bynta ban trei ha kiba bun ki bynta ban pynbit pynbiang ïa ki jingdonkam ha ïing ha sem. Ha kawei pat ka bynta u la pynkynmaw ruh ba mynta ka sngi ka 1 tarik u Jymmang man la u snem ka dei ka sngi ba kyrpang jong ki nongbylla sngi ba la tip kum ka ‘National Labour Day’ ha kaba la rakhe ha baroh kawei ka ri India bad ki don ruh ki Jylla hapoh ka Ri India ba ki ju rakhe kyrpang bad ki don ruh ki ju ai shuti ïa ki nongbylla ha kum kane ka sngi namar ka dei ka sngi ban burom ïa ki nongbylla.
Namarkata, u la buh ka jingkyrpad na ka bynta ki nongbylla ha kylleng ki jaka ba ki dei ban don ka jingïatylli bad don ka jingïasngewthuh jingmut namar lada ki don ne ïa kynduh ïa kino kino ki jingeh ki lah ban ïa khun namar lyngba kane ka jingithuh ba kyrpang kum ha kane ka sngi kum ki nongbylla ki lah ban dawa ïa la ki jong ki hok jong ki ba ki dei hok ban ïoh.
Kumta u la ai ka jingkyrkhu kyrdoh ïa ki nongbylla ba watla ha kine ki jaka kim da ïoh shuti ha kum kane ka sngi ba kyrpang hynrei ïa kata wat sngewpher pynban na ka liang ka sorkar ka dei ban ai ka jingithuh ba kyrpang ïa ki nongbylla sngi bad ba kin don ïa la ka kynhun ka ban long ka nongïada ïa ki nongbylla da kaba don ka jingïakren beit thik ïa ka phang jong ki aiñ bad ba ka sorkar ka dei ban wanrah ruh ïa kita ki Welfare Scheme na ka bynta ki nongbylla sngi.
“Lada ka Meghalaya, ka Ri India bad ki ri ha ka pyrthei ki kwah ban kiew ha ki liang baroh kai donkam beit ïa ki nongbylla kiba don ka bynta ban pyntrei bad pyntyllun ïa ki kam kiba bun”, ong u bah Commander. U la ong ruh ba lada don ki nongtrei ba trei tang da u khulom bad kiba shu shong tang ha ka shuki yn nym lah ban ithuh ba ki shnong ki thaw ki roi ki par hynrei ka donkam ruh ban don ki nongbylla sngi kiba pyntrei ïa ki jingtrei kiba har rukom kum ki ïing ki sem, ki lynti ki synkien, bad kiwei ki lad pynroi.
Kumta haba kren ai mynsiem na ka bynta ki nongbylla sngi ha ka sngi ba kyrpang, u bah Shangpliang u la ong ba ha kum kane ka sngi ka dei ban don ruh ka jingsdang na ka bynta ban ithuh ïa ki nongbylla, ki dei ruh ban don la ka jong ka aiñ, hynrei ki nongbylla pat kim tip ïa la ki jong ki aiñ kum ki aiñ ki ban ïada na ka bynta jong ki, ka aiñ ha kaba kin ïoh ïa ki jinglad jingïarap ha ka por ba ki pang ki shitom, ka aiñ ba kim lah ban trei palat ïa ka kynta ba dei ban trei, ka aiñ ba ki dei ban ïoh ïa ka jingsiew kaba biang, ka aiñ ban ïada na ka jingshah ban beiñ, ka aiñ ba kin ïoh ki jingmyntoi kum ka bai tymmen (pension) bad kiwei de ki lad jingïarap ba ka sorkar ka dei ban leh.
Kiwei pat kiba ïadonlang ki long u bah E.K. Syiemlieh u samla rangbah jong kane ka shnong, ki nongbylla sngi bad ki paidbah ki nongshong shnong jong ka shnong Shaid Shaid Umoid.
