Nongstoiñ, Nailar 25: Kum shibynta ban kyntiew ïa ka kam ïalehkai Sport ha ka dong ka thaiñ bad ha kajuh ka por ban rakhe ïa ka jingdap 25 snem jong ka Seng, ka Mawkadiang Sports Social Welfare & Cultural Organization, ka la ïoh ban plie pyrda ïa ka Silver Jubilee Open To All Knock-Out Football Tournament 2022-23 kaba la pynlong ha madan Mawkadiang.
Ki don haduh 48 tylli ki Club na kylleng ki jaka jong ka thaiñ kiba la wan ban ïashim bynta ha katei ka Tournament bad ka khusnam na ka bynta ki nongjop kan long 25 hajar.
Ïa kane ka lympung la wan ban plie pyrda da u MDC ka Nongstoiñ Constituency u bah Gabriel Wahlang kum u kongsan, ha ryngkat ka jingïadonlang ki nongïalam jong katei ka sport Club, ki nongïalam shnong bad kiwei kiwei.
Ki ar tylli ki kynhun kiba la mih madan ban ïakhun ha katei ka sngi plie pyrda, ki kynthup ïa ka Dumbur AF/C pyrshah ïa ka Eleven Brother ha kaba ka Dumbur AF/C ka la ïoh ban khur ïa ka nam jop da 4 kol la 0 pyrshah ïa ka Eleven Brother.
Na ka liang u kongsan haba ai jingkren ha katei ka sngi, u la ong ba ka jingïalehkai Football ka dei kawei na ki jait jingkilan met ka ban pynïoh ïa ka met ka phad ba koit ba khiah.
U la ai ruh ka jingïaroh ïa ka Mawkadiang SSWCO kaba la pynlong ïa katei ka lympung na ka bynta ban kyntiew ïa ki kam ïalehkai ha ka song ka thaiñ bad kane kan pyllait ruh ïa ki samla ba kin ngop ha ki kam sniew ba laiphew jait.
Shuh shuh u la ong ba kane ka dei ka kabu ïa kito ki samla donsap ba kin pyni ïa ka sap ka phong kaba ki don. U la ai mynsiem ruh ba kin ïalehkai bha khnang ba kin lah ban nang kiew ha ka kam ïalehkai Football na ka por sha ka por.