Jowai, Nailur 27: Ka Khynroo Khyllood Chilliangraij Ñiamtre Committee (KKCNC) ha kane ka 25 tarik kala rakhe ïaka jingdap 10 snem ka jingïaid lynti ban ai jingtip ïa ki khun ka ñiam tynrai shaphang ka jingngeit jong ki longshwa manshwa.
Ïa ka jingïalang la pynlong ha Dorbar Hall jong ka Shnong Chilliangraij ha ryngkat ka jingïasnohkti ki nongïalam Shnong lem bad kiwei de ki dong kiba la wan ban sakhi lang ïa kane ka sngi.
Ha ka prokram la ïoh ruh ki kyntien pdiang na ka Sahakawan Dkhar, ka jingnguh blei da u Boodwanmi, ka Chanlang Pde, Chairperson KKCNC kala pynsngew ïa ka report treikam jong ka Committee, katba u Waheh Shnong ka Chilliangraij u ma Damehiwot Pde ula ai ka sneng ka khraw sha baroh ki khun ka ñiamtrai kiba la wan sha ka jingïalang.
Na ka liang u kongsan jong kane ka sngi u ma Arwotki Sumer, General Secretary Seiñraij bad u ma Sniawbhalang Rangad kum u Symbud kongsan haba kren kila ai ka jingïaroh ïa kane ka seng jong ki samla ka Khynroo Khyllood Chilliangraij Ñiamtre Committee kaba don ïa ka jingthmu ban wanrah ïa ka bha ka miat jong ki khun ka ñiamtrai.
La pynphuh pynphieng ïa kane ka sngi da ki jingshad ki jingrwai tynrai da ki khun samla na ki dong ba kynthup ïa ka Loomiongkjam, Panaliar, Loompyrdi Iongpiah, Khynrookhyllood Committee Seiñraij Jwai, Shlem Hikai Tynre Seiñraij bad ka Seiñtyllilang Ñiamtre Ladthadlaboh.
La sam ruh ia ki khusnam sha ki nongjop ha ka jingïakop nguh blei, ïakop khohpoit, Dat Mooniaw haka juh ka por la pynkup burom kyrpang ïa ka Chanlang Pde, Ka Samum Pde, ka Emhi Pde bad u Lakhon Dkhar kiba long ki nongkyrshan ba hakhmat eh KKCNC ha ka jingïaid lynti.
