Khliehriat, Nohprah 5: Ha ryngkat bad ka pyrthei baroh kawei, ha East Jaiñtia Hills District ruh la rakhe burom ïa ka sngi ba kyrpang jong kito kiba don jing duna ha ki dkhot met ka ‘Inter national Day of Persons with Disabilities, ïa kane ka prokram la khot pynlong da ka ophis jong ka District Social Welfare Officer lem bad ka ophis jong u District Medical & Health Officer, East Jaiñtia Hills District bad ïa ka prokram la pynlong ha Dkhiah West Community Hall. Haba kren ha ka jingïalang, ka District Social Welfare Officer East Jaiñtia Hills District, ka kong R.Pasah ka la ong ba kane ka sngi kyrpang ka long ban kyntiew ïa ki hok jong kito ki briew kiba don jingduna ha ki dkhot met bad ban pynshai paidbah ruh ïa ki hok jong ki kiba na ka bynta ka jingbit jingbiang jong ki, ka la iathuh ruh ba ka ophis jong ka DSWO ka dei ka tnat kaba peit na ka bynta ka jingbit jingbiang jong kiba duna dkhot met bad ruh ban kyrshan lem ïa ki ha ka jingim jong ki
U District Medical & Health Officer, East Jaiñtia Hills District, u Dr. D. Shylla, u la batai ïa ki jait jingduna bapher bapher kiba don ha ki briew kiba don jingduna ha ki dkhot met, u la ong ba ki don ki jait jingduna kiba neh shi jingim bad ki don pat kiba tang shi por kiba dang lah ban sumar da ki jingai jingsumar bad da ki dawai.
U bah J. Pyrtu, uba la mih khmat na ka EPPHATHA Society u la pynsgew ïa ki kam kiba ka Society ka trei na ka bynta kito kiba don jingduna ha ki dkhot met bad ong ba ïa kane shlem treikam ka Society la saiñdur ha u snem 2020 ha East Jaiñtia Hills District bad ka la shim ruh ïa ka synjam ba pynlong ïa ki vocational training ha ka music, ha ka kam suh jaiñ, kaba thir ksai bad kiwei kiwei ki jait kam.
Ka kong B. Biam, kaba dei u UDID in-charge, jong ka Civil Hospital Ialong ka la pynshlur ïa kito kiba don jingduna ha ki dkhot met ba ki dei ban register kyrteng ban ioh ïa ki UDID Card kiba wanrah jingmyntoi ïa ki da ki jait skim bapher bapher bad na ka bynta ban ïoh ïa ki jingiarap ki lah ban leit register ha ophis District Resource Centre, Ialong Civil Hospital.
U bah S. Kamar, uba dei u IED, Coordinator, SSA u la pynsngew ïa ki jait skim bapher bapher kiba na ka bynta kito kiba don jingduna ha ki dkhot met kum kaba ioh ïa ka bai leit bai wan, ki Escort Allowance, Aids bad Appliances, ki Stipen na ka bynta ki khynnah kynthei, ka TLM kits bad ka Scholarship ïa ki khynnah, la kyrpad ruh ïa baroh kito kiba don jingduna ha ki dkhot met ba kin leit sha ophis District Mission Coordinator SSA ba kin ioh ïa ki skim, u kyntu ïa ki kmie ki kpa ba kin dei ban kyntiat ïa kane ka jingkyrpad bad ba kin phah ïa ki khynnah sha ki skul namar ba ka sorkar kan iarap da ki scholarship ba kyrpang ïa ki.
Ha kane ka sngi ba kyrpang, la ïoh ban pynkupburom ïa ki phra ngut ki nong shong shnong kiba don jingduna ha ki dkhot met halor ka jinglah jong ki ha ki kam ba shna da ki kti, ha kaba shet jingbam bad ba shna ïa ki tiar jinglehkai. Kumjuh ruh, ka ophis jong ka District Social Welfare Ophis ka la sam ïa ki tiar ban kyrshan ïa ki lem bad ki jingai sngewbha bad ka ophis jong u DM&HO ka la pynlong ruh ïa ka jingsam dawai ei kaba la long ka jingmyntoi ïa kiba la wan sha kane ka prokram.
