Nongpoh, Nailur 01: Ka skulbah USTM mynta ka sngi kala pynlong ïaka 9th Memorial Lecture halor ka phang “The Legacy of PA Sangma, the role of the present government and Meghalaya 2040” kum ka jingburom ïa u (L) Purno A Sangma kum uwei naki nongïalam ba iohi jngai ka thaiñ Shatei Lam Mihngi ka ri India.
Ha katei ka sngi u Dr C Lyngdoh MLA ka Umsning u la leit ban shim bynta kum u kongsan haka jingdonlang ka Violet Baruah, IPS (Retd.), Inspector General of Police barim ka Assam kum ka symbud kongsan, ki bor pynïaid jong ka skulbah USTM bad kiwei kiwei.
U Prof GD Sharma Vice Chancellor ka skulbah USTM haba kren ha katei ka sngi u la ïasam ïa ka jingkynmaw shimet jong ka jingleit sha Shillong ha u snem 2008, shwa ban seng ïa ka USTM, bad u Mahbubul Hoque bad u Shri R.K Sharma. Hangta, ki la ïakynduh ïa u P.A. Sangma, uba ki kyntien ai mynsiem jong u ki sawa bad im haduh mynta ha kaba u la ong ba “Ka skulbah jong phi ka dei ban long kaba bha tam ym tang na ka bynta ka thaiñ shatei lammihngi bad ka jaitbynriew, hynrei ha ka kyrdan jong ka pyrthei.” Mynta, kita ki kyntien ki la bad ka skulbah USTM ka rung ruh haka thup ki 200 tylli ki skulbah ba pawnam jong ka India bad ka jingïoh ïa ka jingithuh jong ka NAAC ‘A’ haduh lai snem kynthih.
Na ka liang ki kongsan ha katei ka sngi kila ïakren shaphang ka sorkar jylla bad ka thong naka bynta u 2040 khamtam ban kyntiew ïaka pule ka puthi. Kila ong ruh ba u PA Sangma u dei shisha u nongïalam uba iohi jngai bad ka sngewkmen shibun ba ka USTM ka rakhe ïaka sngikha jong u briew u ba la ioh kheit shibun u soh ryngkat ka nam haka por kaba lyngkot.
Lyngba katei ka sngi la ioh ruh ban sam ïaki khusnam sha ki nongjop haki jingïakop thoh essay bad kumjuh ruh ka jingïakop dro dur kum ka jingpyndon burom ïa u PA Sangma kumba ka nongrim bad ka jinglam lynti jong u ngim lah ban klet bad ka sah haka dohnud.
