Rai u Myntri ban dang kyntiew ïa ka kam jngohkai ha ka jylla, yn phai khmat kyrpang sha Garo Hills

Shillong, Risaw 5 : Hadien ba la shimti noh ïa ka tnad kam jngohkai pyrthei da u Timothy D Shira, une u Myntri thymmai kane ka tnad u la pynpaw ba un trei ban nang kyntiew ïa kane ka tnad ha kylleng ka Meghalaya hynrei u la pynbna ba un phai khmat kyrpang ruh sha ki jaka ba pawnam ha ri lum Garo ïa kiba ym pat shim khia haduh mynta.
Kane ka jingpynbna jongu khlem pep ka pynpaw shai ba u Myntri un kham pynleit jingmut ban kyntiew noh ïa ka kam jngohkai pyrthei ha ri lum Garo namar u la ai nuksa kum ka krem Siju kaba dei kawei ne ki krem kaba pawnam bha hynrei haduh mynta ym pat leh ei ei ïa ka. U la ai nuksa ba ha ka jingleit jongu sha New Zealand bad ïoh rung ha kawei ka krem u la ïohi ba la shna ïa ki lynti iaid kjat shapoh krem ryngkat ka jingpynbiang ïa ka bording electrict ba ki nongwan jngohkai kin suk bad ïohi ban ïaid khlem da hap ban law ïa ki juti. Kane ka pynpaw ba u don ka jingthrang ban bud nuksa na katei ka krem ha New Zealand ban leh ha ka krem Siju ruh.
Lah ban kdew hangne ba kane ka tnad kam jngohkai pyrthei ne Tourism ka dei kaba la ïoh bat da ka UDP haba dang long Myntri u bah Paul Lyngdoh. Hynrei hadien ba ka UDP ka la pynhiar shuki noh ïa u bah Paul ka la duh noh ïa kane ka tnad bad poi noh sha ka NPP. Ym tang ka tnad Tourism hynrei wat ka tnad Social Welfare ruh ka la poi sha ka NPP. Ka long ka jingduh nong kaba khraw ïa ka ri Lum Khasi bad Jaintia hadien ba ka UDP ka la pynhiar shuki ïa u bah Paul namar ha ka por jong u bah Paul kane ka kam jngohkai ka la kiew bha ha kine ki Lum Khasi bad Jaintia bad wat sha ri lum Garo ruh. Hynrei mynta khlem pep ka ban ïoh nong bha kan dei ka ri Lum Garo kumba la pynpaw da u Myntri ba yn phai khmat kyrpang sha ri Lum Garo.