Shillong, Naiwieng 6 : U Bah Teinwell Dkhar uba long u MDC jongka Shella Constituency, ula shim ïa ka rai ban ym ïakhun shuh ïa ka elekshon MDC ka ban wan namar ka jingbym don ha ka met kaba koit ba khiah.
U Bah Teinwell Dkhar uba la don 60 snem ka rta ula pynpaw ba ka jingshim ka jongu ïa katei ka rai ka dei namar ka jinglong jingman jong ka koit ka khiah ka jong u.
Ula ong, ba watla un ym ïakhun shuh ïa ka elekshon MDC hynrei un ïai bteng pat ban trei bad ban long kum u dkhot jong ka seng United Democratic Party (UDP).
U Bah Teinwell ula don la slem bha ha ka seng UDP bad ula shakri ruh kum u General Secretary jongka East Khasi Hills bad u dei ruh u paralok uba ïajan bha bad u (L) Dr. Donkupar Roy, u Myntri Rangbah barim ka jylla.
U Bah Teinwell ula long MDC la bun snem bad ula long teng ruh kum u Chief Executive Member (CEM) ka Khasi Hills Autonomous District Council (KHADC).
Ha kaba ïadei bad ka jingjied kyrtong na ka bynta ban iakhun iaka elekshon MDC na Shella, u Bah Teinwell ula ïathuh ba un sa shim ïa ka rai kaba khatduh da ka jingïatreilang hapdeng jong ka seng bad ki nongkyrshan ki jong ka.
