Shillong, Jymmang 13: U Bah Rocky Hek, uba dei u pyrsa jong u Bah AL Hek, MLA, u la rai ban ïakhun ïa ka elekshon MLA 2023 na Pynthorumkhrah Constituency, kaba mut u hap ïakhun pyrshah ïa u kñila jong.
U Bah Rocky, u la pynbna ïa kane mynta ka sngi ha ka jingïalang bad ki nongthoh khubor, ha kaba u la ïathuh ruh ba un ïakhun na ka Seng National People’s Party (NPP).
Ha kane kajuh ka sngi, u Bah Rocky, uba la ïakhun ruh ïa ka elekshon MDC na Mawkhar- Pynthorumkhrah Constituency ha u snem 2019, u la pyntip ba u la mih noh na ka Seng BJP bad kumjuh ruh u la risaiñ na ka kam Secretary jong ka Seng BJP Shillong City.
Haba la kylli halor ka jingïeng ïaleh pyrshah ïa la u jong u Kñi, u Bah Rocky, u la ong ba um don kano kano kaba pyrshah ïa u Bah AL Hek, hynrei u la mih ban ïakhun ïa kane ka elekshon ban wanrah shuh shuh ïa ka roi ka par ha ka Constituency.
Ha kajuh ka por u Bah Rocky, u la ong ba ha ka jingshisha u la sdang ban ïaid sha North Shillong ban ïakhun na kane ka Constituency ban ïakhun na ka BJP. Hynrei hadien la wan mih kiwei pat ki rangbah kiba la pynbna ba kidei ki kyrtong ka BJP bad ki la ïoh ïa ka ticket na ki heh jong ka Seng. Hynrei na ka liang jong u, um tip pat ki ïoh shisha ne em.
Na la liang jong u, u la ïathuh ba ka jingmih jong u ha kane ka elekshon MLA ban wan ruh kam dei kaba u shu mih kumto, hynrei kadei kaba u la ju trei ha ki kam paidbah la slem bha, ha kaba u la ju ïarap ïa ki paidbah ha ka shitom ka shipa, ha kiwei de ki jingeh jongh ki shnong ki thaw, ki jingeh jong ki paidbah, ki samla bad kiwei kiwei de ki kam bhalang.
