Rai tyngeh ka sorkar ban phah khang noh ïa ki skul ba bun ki nonghikai ïa ki khynnah skul

Shillong, Nohprah 06 :U Symbud Myntri Rangbah ka Jylla, Bah Prestone Tynsong u la ong ba ka sorkar mynta ka don ha ka kylla kaba khatduh ban pynbeit tynrih noh ïa baroh ki skul kiba don ha ka jylla (rationalisation) khnang ba ka jingdon ki nonghikai bad ka jingdon ki khynnah kan ym long noh shilliang shuh.
“Don ki skul ba bun ki nonghikai ban ïa ki khynnah skul. Kumta, ngi na ka liang ka sorkar ngi la shim ïa ka rai kaba skhem ba ïa kiba kum kita ngim banse ba ngin hap ban ong ïa ki ban khang noh,” ong u Symbud Myntri Rangbah haba kren ha ka jingialang rakhe ia ka Jubili Ksiar jong ka skul St. Peter & Paul Mawkisyiem ha kane ka sngi Thohdieng.
“Kane kadei ka jingmaham kaba ngi ai lypa ïa kiba kum kita ki skul kiba ym lah ban bud ne don ïa ki jingdonkam kiba rit tam kaba ka polisi jongka Sorkar India bad ka polisi jong ka sorkar jylla ngi la dep pyntreikam ha u 2019 – 2020 kumba la ong u Myntri ka tnad Pule Puthi,” bynrap biang u Symbud Myntri Rangbah.
Shuh shuh u ïathuh ruh ba kum ka sorkar ki ïohi ba don bun bha ki skul ha nongkyndong kiba leh bha la ka long ha ka jingbun ki khynnah skul lane ha ka jingdon ki khynnah kiba pass bha hynrei na ka sorkar kam lah ban ai ïa ki jingïarap ba donkam. Tangba u ong pat ba don ki skul kiba ym lah ban leh bha ne ai ka jingshakri kaba biang hynrei teng teng ki kham ïoh bun ma ki ïa ki jingmyntoi
Kumta u ong ba mynta ka sorkar ka la rai ba la kumno kumno ha ki khyndiat taiew ban wan kin sa lah ban shim ïa ka rai kaba khatduh halor kane.
“Ïa ki skul kiba lah ban shakri bha la ka long ha ka jingbun ki khynnah, ka jingdon kiba pass, ïa kiba kum kita ka sorkar kan don ryngkat ryngkat,” u la ong.
U ong ruh ba lada ka sorkar ka leh kumta kan long ka jingkyrkhu ïa ki khun ki kti jong phi ym tang ha sor Shillong hynrei khamtam eh ha ki nongkyndong. U Symbud Myntri Rangbah u ong ruh ba lada peit lei lei ïa ka result na kawei ka snem sha kawei pat la ka long ha ka klas 12 ne ha ka Matrik mynta bun bha ki skul na nongkyndong ki la mih lang ban knieh ha ka Top10 bad Top20.
“Dei na kane ka daw ba ki khmat jong ka sorkar ka peit bha sha ki skul ha nongkyndong namar ngi kwah ban kyntiew lang shuh shuh ïa ka jingtbit jong kine ki skul ha baroh kawei ka ka jylla.
Ha kajuh ka por u la kynthoh kylla ïa ki briew kiba kynthoh ïa ka kot ïarap na ka bynta ki samla pule ba pynkhreh na bynta ka Matrik kaba tip kum ka CM Impact da kaba ong ba kito kiba kynthoh ki dei ban tip ba kane ka dei ka kot ïarap ym ka kot pule.
U la ong ruh ba ki paidbah bad ki kmie ki kpa ki dei ban sngewthuh bad kim dei ban shah ïalam bakla namarba ïa kane ka kot ïarap la pynkhreh da kaba leh sani bad bishar bniah da ka MBOSE.