Rai pynsangeh kit khynnah skul ki bus MTC naduh ïaiong lah ban pynbun bus STEM ka sorkar

Shillong, Kyllalyngkot 12 : U Myntri ka Tnad Pule Puthi Bah Lahkmen Rymbui ula pynpaw ba um pat tip thikna halor ka rai jong ka Meghalaya Transports Corporation (MTC) ban pynsangeh noh ïa ka jingshakri ki bus skul naduh ka 1 tarik Iaiong, 2026.
“Ngim pat ïoh kylli ïa kaei ka daw ba ka MTC ka la rai ban pynsangeh kumta, tad ynda hadien ba nga tip ïa ki daw, ka long kaba eh ïa nga ban kynthoh halor kane” ong u Bah Lahkmen ha ka sngi Nyngkong haba jubab ïa ka jingkylli halor ka rai ka MTC kaba la wanrah ïa ka jingsngewkhia hapdeng ki Kmie Kpa, kiba khuslai halor ka jinglah ban kyrshan bad shaniah ïa kiwei pat ki kali skul kynthup ki bus STEM bad ki kali shimet.
Hynrei, u Myntri ula pynpaw ïa ka jingpyrshang jong ka Sorkar ban leh eiei halor ka jingkhapngiah ki surok bad ban kyrshan ïa ki khynnah skul, haba kdew ïa ka jingsdang pyntreikam ïa ki bus STEM arsnem mynshuwa da u Myntri Rangbah ka Jylla Conrad K Sangma.
“Nga da sngewnguh shisha ïa u Myntri Rangbah namar arsnem mynshuwa, ula pyllait ïa kine ki bus STEM kiba la ïarap bha” ong u Bah Lahkmen haba pynpaw ïa ka jingsngewskhem ba ka Sorkar kan nang pynbun shuh shuh ïa kine ki bus.
U Bah Lahkmen ula ban jur ïa ka jingaiti jong ka Sorkar sha ka jingshakri ïa u paidbah bad ong “Ka dei ka kamram jong ka Sorkar, ka Sorkar ka dei na ka bynta u paidbah”.
Ula kular ba lada kine ki bus STEM ki long kiba ïarap shisha, ka Sorkar kan sa nang pynbun ïa ka jingdon jong ki ha kine ki bnai bad snem ban wan.