Nongstoiñ, Naitung 07: U Superintendent of Police West Khasi Hills District Nongstoiñ bah B.D Marak, u la pyntip sha ki paidbah halor ka jingjop jong ka tnad pulit ban tohkit bniah ïa ki lai tylli ki mokotduma ba kyrpang kiba ïadei bad ka jingshah thombor ha ki khynnah rit.
Ka jingrai pynrem jong ka Kashari ïa kine ki nongleh kam sniew baroh hapoh ka aiñ ïada ïa ki khynnah na ki kam leh beijot (POCSO) kynthup ïa u Sanjay Kumar Thakur, Louis Jaggu Diengngan bad u Maximus Puweiñ.
Ha ka 10 tarik Jymmang, 2022, la ïoh pdiang ïa ka mokotduma (FIR) ba ha ka 9.5.2022 u Sanjay Thakur, u la leh ïa ki kam thombor pyrshah ïa kawei ka khynnah bad mar mar la register mokotduma hapoh thanad Nongstoiñ vide Case No. 37(05) bad la shanïah ha ka WPSI D.P. Nongbri jong ki pulit kynthei Nongstoiñ ban pynlong ïa ka jingtohkit. Hadien ka jingtohkit kaba bniah, la pynngat mukotduma bad la aiti sha ka Ïingkashari ba don burom jong u nongbishar ba kyrpang (POCSO), Nongstoiñ na ka bynta ka jingbishar.
Ha ka 30 tarik u Jylliew 2025 ka Kashari ba don burom u Nongbishar Ba Kyrpang (POCSO) hadien ba u la bishar bniah ïa baroh ki sakhi satar, kaba la lap na ka jingthohkit, la rai pynrem pyrshah ïa u Sanjay Kumar Thakur da ka jingset along kaba haduh 3 snem ryngkat ka kuna kaba 10,000/- (Shiphew Hajar) na ka bynta ka kam runar kaba hap hapoh ka kyndon 8 jong ka POCSO Act. Lada ym lah ban siew ïa kane ka kuna yn pynjlan ïa ka jingset along sa 6 bnai.
Ka Jingpynrem ïa u Louis Jaggu Diengngan ka la long ha ka 3 tarik Naiwieng 2021, la ujor mokotduma FIR pyrshah ïa u Louis Jaggu Diengngan na ka shnong Riangdo halor ka jingthombor bad leh beijot ïa kawei ka khynnah rit kaba u la leh hapdeng ka 29.10.2021 haduh ka 31.11.2021.
La register motkotduma hapoh Mawshynrut PS Case No115. 5(l)/6 jong ka POCSO Act, bad ïa kane ka kam la aiti ha ka WPSI L. Siangshai jong ka Nongstoiñ Women Police Station ban tohkit bniah.
Hadien ba la dep ban tohkit bniah la pynngat mokotduma hapoh ka kyndon 7/8 & 3(a)/4 jong ka aiñ POCSO ryngkat bad ka kyndon 363 IPC bad la aiti sha Ïingkashari ba donburom jong u nongbishar ba kyrpang (POCSO), Nongstoiñ.
Ha ka 30.06.2025 ka Ïingkashari ba don burom jong u nongbishar ba kyrpang (POCSO), Nongstoiñ da kaba pynshong nongrim bad bishar bniah na ki jingtohkit, ka Kashari ka la rai pynrem pyrshah ïa u Louis Jaggu Diengngan ban set along haduh 3 snem bad ka kuna kaba 10,000/- katkum ka kyndon 7/8 jong ka POCSO Act 2019 ka Kashari ka rai shuh shuh ban shet phatok kaba kham tyngeh haduh 20 snem bad ka kuna kaba 25,000/- tyngka katkum ka kyndon 3(a)/4 jong ka aiñ POCSO Act bad ka jingpynshitom hapoh ka kyndon 363 IPC la rai ban set set phatok haduh 5 snem bad ka kuna kaba 15,000/- tyngka bad lada ym lah ban siew ïa ka kuna yn pynjlan shuh shuh ïa ka jingset along sa kumba 6 bnai.
Ka rai pynrem ïa u Maximus Puweiñ ha ka 8 tarik Naitung 2022 la ïoh pdiang ïa ka mokotduma (FIR) kaba la kynnoh ba u Maximus Puweiñ na ka shnong Maweit, ba u la leh beijot ïa iwei i khynnah rit ha ka 7 tarik Naitung 2022. La register case ha Nongstoiñ Police Station vide Case No. 50(07) Act 2022 bad la aiti ïa kane ka mokutduma ha ka WPSI N. Wanniang jong ka Nongstoiñ Women Police Station na ka bynta ban tohkit bniah halor kane ka mokotduma.
Hadien ba la dep ban tohkit bniah la pynngat mokotduma bad la phah sha ka Ïingkashari ba don burom jong u nongbishar ba kyrpang (POCSO), na ka bynta ban tian bishar. Kumta ha ka 23.06.2025 ka Ïingkashari ba don burom jong u nongbishar ba kyrpang (POCSO) Nongstoiñ da kaba pynshong nongrim ïa ka jingtohkit bad bishar bniah ïa ki jinglap na ka jingtohkit, la rai pynrem ïa u Maximus Puweiñ da kaba set phatok haduh 2 snem bad 6 bnai ryngkat ka kuna kaba 10,000/- na ka bynta ka kam pynkheiñ aiñ kaba la leh hapoh ka kyndon 7/8 jong ka POCSO Act. Lada ym lah ban siew ïa katei ka kuna yn sa shah set along shuh shuh sa 6 bnai.
Kine ki jingshah pynrem ki long ka sakhi ïa ka jingaiti lut bad ka jingshimkhia jong ki Pulit ka West Khasi Hills, ban pynthikna ïa ka jingbishar hok ïa kiba ngat ha ki kam runar pyrshah ïa ki khynnah. Ki Pulit District ki dang ïai bteng ha ka jingpyrshang jong ki ban ïada ïa ki khynnah bad ban pynngat ïa ki nongleh kam sniew ha ka aiñ.
