Rai pynrem ka ïing kashari POCSO ïa 3 ngut ki rangbah ba batbor ïa 3 ngut ki heprit ha Ri-Bhoi

Nongpoh, Nailar 28: 3 ngut ki rangbah kila shah rai pynrem haka iingkashari jong ka Special Judge (POCSO), Ri-Bhoi District hadien ba kila batbor ïa 3 ngut ki heprit hapdeng ka jingshoh u khawiang haka jingjia kaba la jia haka 28 tarik Jylliew 2017.
Kitei ki 3 ngut ki rangbah bala shah rai pynrem ki kynthup ïa u Mawri Ksing, Sbishon Songthiang bad u Bron Prang.
Kum ban shu kdew hangne ba ki pulit ka Nongpoh PS kila ïoh ka jingujor haka 29 tarik Jylliew 2017, hadien ba 3 ngut ki briew hadien ba kila dep dihkyiad kila batbor ïa 3 ngut ki heprit haka 28 tarik Jylliew 2017 bad naka liang ki pulit mardor kila register mukotduma ha Nongpoh PS, haka jingtohkit bala lamkhmat da ka kong E Khardewsaw UBSI, bad hadien ka jingtohkit ba bniah ki pulit kila phah chargesheet haka 23 tarik Risaw 2017.
Hadien ka jingbishar jong ka Special Judge (POCSO), Ri-Bbhoi District la shem ba kitei ki 3 ngut ba kynthup ïa u Mawri Ksing, Sbishon Songthiang bad Bron Prang kila leh ïa katei ka kam bymman bad rai pynrem ïaki hapoh ki kyndon aiñ 448/376D/511/354A IPC r/w Section 9(g)/10 POCSO Act.
Lyngba katei ka rai, ka kashari ka la rai pynrem ïa kitei ki 3 ngut da kaba (i) set phatok haduh 10 snem bad ka kuna kaba T. 20,000/- na ka bynta ka kam pyrshang ban leh beijot da ka kynhun hapoh ka kyndon aiñ 376D/511 IPC (ii) set phatok kaba 6 bnai halor ka jingrung jubor sha iing hapoh ka kyndon aiñ 448 IPC (iii) ka jingshah set phatok kaba tyngeh haduh 2 snem bad ka kuna kaba T.1,000/- na ka bynta ka kam lehbeijot hapoh ka kyndon aiñ 354A IPC (iv) ka jingshah set phatok kaba 6 snem bad ka kuna kaba T.10,000 na ka bynta ka kam leh beijot kiba kham triem.