Shillong, Nailur 14: Watla ka Sorkar Jylla kam pat pynbna ïa ka tarik elekshon la ka long ha KHADC ne ha JHADC hynrei na ka liang ki samla NPP hapoh ka lama jong ka National People’s Youth Front (NPYF) ki la pynpaw ba ki la long lypa kiba la pynkhreh ban trei na ka bynta ka party haba ïadei bad ka elekshon MDC.
“Ka jingpynkhreh jong ki samla na ka party ha ka elekshon MDC ka ban sa wan shen ka long ban pynkhlaiñ shuh shuh ka jingtreikam naduh ki unit, haduh ki block, ki distrik bad haduh ka jylla hi baroh kawei,” ong u President ka NPYF Bah Kitborlang Nongrem.
Da kaba kubur ba ki samla ki don ka bynta kaba khraw bha ha kane ka elekshon MDC, u President u ong ruh ba kin pyntikna ba ki samla ka party kin trei shitom arshah ha kine ki bnai ban wan na kaba ki trei baroh shi katta khnang ba ki kyrtong ka party kin poi sha ka thong la ka long naduh ha rilum Khasi bad haduh rilum Jaiñtia kumjuh ha ka jylla hi baroh kawei.
Haba ïadei bad ka NPP u la pynkynmaw ba ka party ka la don tang 2 ngut ki MLA ha ïing Dorbar hynrei ka la kiew pat sha ka 19 ngut bad ha ka elekshon 2023 ka NPP ka la jop 26 ngut.
“Hynrei da ka jingwan pynïasoh jong ki arngut ki MLA ka PDF bad lai ngut ki MLA ka Congress, ka party mynta ka la kylla long ka party kaba lah ban synshar hi tang marwei ïa ka sorkar ha ka jylla (single majority) da kaba kot haduh 31 ngut,” u la bynrap biang.
Kumta u ong ba ki jingkynthoh ba ka NPP ka tlot kadei tang ka nia elekshon ong ka Liang Pyrshah khamtam haba wat ha ka elekshon NPP watla kim jop hynrei ki la ïoh kumba ar lak vote duna.
“Kumta ha ka elekshon MDC phin sa ïohi ïa ka jingkylla bad kumta na ka liang ki samla NPP ruh kin trei borbah na ka bynta ban pynkhlaiñ shuh shuh ïa ka party nangne shakhmat,” u la ong.
Lah ban kdew hangne ba ka sorkar jylla ka la pynjlan biang sa 6 bnai ïa ka samoi treikam jong ka KHADC hadien ba ka jingpynjlan kaba 6 bnai ha ka sien kaba nyngkong ka la kut noh ha ka taïew ba nyngkong u Nailur.
