Shillong, Naitung 18 : Ka jingbym seisoh ka jingïakren bad u Mission Director jong ka ka National Health Mission ka la pynlong ïa ki nongtrei jong ka EMRI-108 kiba don hapoh ka shatri jong ka Meghalaya EMRI Workers’ Union (MEMRIWU) ban pynbna ba kin ïaid beit shakhmat ïa ka jingïakhih kaba khlem pud sngi.
Na ka liang ka MEMRIWU ha ka step sngi Nyngkong ki la kynduh ïa u Mission Director na ka bynta ban dawa ba dei ban pynkut noh ïa ka soskular hapdeng ka GVK bad ka sorkar kumjuh ruh ban dawa na ka sorkar ba kadei bna pynïaid hi noh ïa ka EMRI.
Halor kane, ka President ka MEMRIWU Kong Microlina Syiemlieh ka la ïathuh ba katei ka rai ba ki shim ban ïaid shakhmat kadei namar ka jingïakren bad utei u heh ka tnad, kam shym la long kaba seisoh.
Ka jingdawa ba ka Union ka pynsngew ka long ban kyndang noh ïa ka GVK da kaba kynnoh ba ka jingdkoh treikam ka la nang jur bad ka jingdon jong kane ka kompeni mynta ka long tang kum ka shynrong.
Lah ban kdew hangne ba katei ka rai ban sangeh treikam ka la sdang naduh ka step sngi Nyngkong badna ka liang ka Union ki la byrngem ba kin ïai bteng ïa kane katba kim pat ïoh ïa kano kano ka jingkular kaban pynhun ïa ka jingdawa jong ki.
