Rai ki nonghikai MSSASA ban file da ka review petition ïa ka hukum ka Supreme court

Shillong, Risaw 06: Ka Meghalaya SSA Schools Association (MSSASA) Central Body ha ka jingïalang paidbah kaba la long ha Madan Malki ha ka sngi nyngkong ka la shim ïa ka rai ïamynjur lang ban file da ka Review Petition ban ïakhun ne Challenge ïa ka hukum jong ka Ïingbishar Supreme court ba la pynmih ha ka 1 tarik u Nailur 2025 ba baroh ki nonghikai ki hap ban pass ïa ka Meghalaya Teacher’s Eligibility Test (MTET) ha kaba na ka liang ki nonghikai baroh ki la pynpaw ïa ka jingsngewkhia.
Na ka liang u President ka MSSASA u Bah Aristotle C Rymbai u la ong ba na ka liang ki nongkitkam ka seng haba phai sha kane ka hukum la sngewdei ban phai sha baroh ki nonghikai ban ïoh ka jingmynjur ban Challenge ïa kane ka hukum, wat la sngewthuh ba kan ktah ïa ka jinglut jingsep.
Kumta u la ong ba kum ki nonghikai ym lah ban shu shongkli kti halor kane ka hukum namar kane ka hukum ha ka jaka ba kan pynïaid shakhmat hynrei ka ïaid pynban shadien.
U la ong ba ha ki snem ba la dep kiba pass ïa ka Central Teachers Eligibility Test (CTET) ym donkam shuh ban ïakhun ïa ka Meghalaya Teacher’s Eligibility Test bad kane kadei ka hukum ka Supreme court ha ka 25 tarik u Nailar 2010 bad kiba donkam ban ïaleh ïa ka MTET ki long kiba dang hikai ha lane shwa ka snem 2010.
Kumta u la ong ba ka pynmih syndet ka Supreme court ïa ka hukum kaba 1 tarik u bnai Nailur 2025 kaba ong ba baroh ki nonghikai ki hap ban pass ïa ka MTET ka la wanrah ka jingsngewkhia ïa baroh ki nonghikai, kumta ka seng hadien ba la ïasyllok bad ki nongsaid aiñ la shim ka rai ban ujor ne challenge ïa kane ka hukum da kaba file da ka review petition.
Haba batai kham bniah shuh shuh ïa kane ka jingdonkam ban ïaleh ïa ka Teachers Eligibility Test u Bah Rymbai u la ïathuh ba ha ki snem kiba la dep na ka liang ka sorkar jylla ka la pynlait ïa ki nonghikai ban ïaleh ïa kane ka eksam.
“Ha ka 23 tarik u Nailur ngi la dep ban kynduh ïa u Myntri ka tnat Pule puthi ka jylla u Bah Lahkmen Rymbui ban ïakren halor kiba bun ki mat bad na ka liang jong u ruh, u la mynjur lang bad ki jingpynpaw jong ki nonghikai haba ïadei bad kane ka jingdawa bad ngi la kyrpad ruh ïa ka sorkar ba kan ïakhun ïa kane bad ban wanrah da ka Special Teachers Eligilibility Test na ka bynta ki nonghikai Inservice ba kin pass ïa ka TET naba kiba shah ktah na kane ka jingshim bishar jong ka Supreme Court ka dei hi ma ngi ki nonghikai,” bynrap u President ka MSSASA.
U la ong ruh ba ka jingpynmih hukum jong ka Supreme Court ha ka 1 tarik u Nailur 2025 ka long kaba ïaid pynban na shadien namar ki nonghikai kiba la jan shongthait ruh kin hap ban pass ïa ka MTET.
U la ïathuh ruh ba ka sorkar pdeng lyngba ka jingpynbna kaba ïaid lyngba ka National Council for Teachers Education (NCTE) kaba 23 tarik u Nailar 2010, lyngba u snem 2017 ka la wanrah ka jingpynkylla ïa ka RTE Act 2009 ha kaba ka sorkar pdeng ka la pynskhem ïa ka kam shakri ki nonghikai kiba la don lypa ha ka kam ki bym pat pyndep training DLED ne B Ed ha kaba ka la pynjlan ïa ka por haduh 4 snem bad kane ka jingpynkylla ïa dei halor ka section 23 jong ka RTE Act.