Rai ki nonghikai Adhoc ban sah miet ha surok tad haduh ynda shim rai ka Kynhun Myntri

Shillong, Naitung, 02: U Babu Mayborn Lyngdoh u la ïam rangbah katba u dang ai jingkren sha ki para nonghikai kiba la iehnoh ïa la ka jong ka ing ka sem bad ïa la ki khun ki kti bad ïashim bynta ha ka jingïakhih kaba jaijai ba la pynlong da ka Federation of All School Teachers of Meghalaya (FASToM) kaba la kynjoh sha ka sngi kaba san ha ka sngi Saitjaiñ.
Ha rilum Garo ruh ki nonghikai skul Adhoc ki la sahmiet ha surok hakhmat ka Mini Secretariat ha Tura, West Garo Hills District. Ki nonghikai skul Adhoc ha ka Sngi Saitjaiñ ki la shim beit ïa ka rai ban sahmiet ha Parking Lot, markhap bad ka Addl. Secretariat, Shillong tad haduh ba ka Sorkar kan da shong ïa ka jingïalang jong ka Kynhun Myntri ban pynurlong ïa ka jingdawa, kata, ban pynkiew ïa ka tulop da T.18 hajar naduh ka kyrdan Lower Primary haduh Higher Secondary, kynthup ruh ïa ki nonghikai ha ka Sobjek Science bad Hindi.
Kane ka rai kaba ki nonghikai skul Adhoc ki la shim ka long hadien ba kim shym la hun ïa ka jingkular tang da ka ktien jong u Symbud Myntri Rangbah u Bah Prestone Tynsong uba la khot ïakren ïa ki nongïalam jong ka FASToM ha ka sngi Thohdieng.
Kane ka jingpyneh jong ki nonghikai skul Adhoc ka long hadien ba ka Sorkar Meghalaya Democratic Alliance (MDA) kam shym la lah ban pynurlong ïa ka jubanlak ba la khlei da u Myntri Rangbah ka Jylla u Conrad Kongkal Sangma ha ka 12 tarik u Jymmang, mynta u snem.
Haba pynphai nia kylla ïa u Bah Prestone u Babu Mayborn u la ong, “lada kane ka jingïakhih ki nonghikai ka don eiei sha lyndet kumba kam da u Bah Prestone, kata, kaba don shalyndet ka dei ban kyntiew tulop da T. 18 hajar bad ka jingpynkiew tulop kaba 5% manla u snem.”
“Lada kane ka jingïakhih jong ngi ki nonghikai kan kylla saiñ pyrthei, kane keiñ ka saiñpyrthei kaba ngi angnud ha kaba ki sengsaiñ pyrthei kiba don ha ka Sorkar bad ha ka Liang Pyrshah ki pynpaw lem ïa kajuh ka thong na bynta ka bha ka miat jong ngi ki nonghikai,” u la ong.
Halor ka jingwan ai mynsiem jong ki nongïalam ki seng saiñpyrthei, u Babu Mayborn Lyngdoh u la pynpaw ba ki nonghikai ki kwah ruh ba kito ki nonghikai kiba don ha ka kam saiñpyrthei da kaba jer kyrteng ïa ka Kong Ampareen Lyngdoh bad u Dr. Jemino Mawthoh ba kin wan ai mynsiem lem namarba kum ki nonghikai ki kham sngewthuh kaei kaba ki nonghikai mynta ki ïakynduh jingeh.
U Babu Mayborn uba dang ai jingkren ha kane ka khyllipmat, u la jawummat rangbah.
“Ka pang ka mynsiem jong nga namarba ngi shong sah hangne ban dawa ïa kaei kaba ngi dei hok,” la ong u Babu Mayborn.
“Phi (Sorkar) lah ban khot jingïalang kyrkieh mynta ka sngi ruh. Wad ïa ki lad ki lynti namarba ngim kwah ban shong sah hangne. Ka mynsiem kam lah shah ban peit ïa ki para nonghikai kynthei kiba ieh ïa la ki jong ki khun ki kti bad ïa la ka ing ka sem ban wan ïasnohkti lang ha ka jingïakhih,” u la ong ryngkat ka jingjaw ummat.
Haba kynthoh ïa ka jingmutlop jong ki Myntri Sorkar, u Babu Mayborn u la ong, “namarba ki (Myntri Sorkar) shong hangtei (ha Secretariat) kim tip eiei ïa kaei kaba jia hangne.
“Kane ka jingïakhih jong ki nonghikai ka wanrah ïa ka jingïatreilang jong ki sengbhalang na bynta kawei ka mat,” u la bynrap.
U la ïathuh ruh ba wat iwei i nonghikai iba dang don i khun ba dang lai bnai i la wan shim bynta ha ryngkat i khun kumjuh ruh ki nonghikai kiba dei ki riewkyn thei ki la wan shimbynta shitrhem khlem da kheiñ ïa ka miet ka ïong.