Jowai, Nohprah 14 : Ki Home Gaurd Volunteers (HGV) na Ri-Lum Jaiñtia kiba la ju pyndonkam da ka sorkar ha ki por ban ïakhun ïa ka khlam COVID-19 naduh u snem 2020 kila pynpaw ba ha kane ka kynti kin ym treh ban leit duty Election wat lada phah ïa ki da ka sorkar ruh namar ba kim pat ïoh lut wat tang ïa ka bainongsngi jong ki kaba dang sah haduh mynta khlem pat siew lut.
Kumta da ka jingïasnohkti lang baroh ki Home Guard Volunteers ki la shim ïa ka rai da kawei ka sur ba kim treh shuh ban leit duty election ha u 2023 katba ka sorkar kam pat siew dep ïa ka bainong sngi jong ki.
Haba u nonglum khubor ula ïoh ban ïakren bad ki katto katne ki Volunteer ki la ong ba ka long ka jinglehraiñ ïa ka sorkar MDA kaba haduh mynta la 2 snem ki la ïaishah hynrei ka sorkar kam patiaw ïa ki. Ha ki jingkhot ïakren na ka por sha ka por ka sorkar kala shu pynbeij bad kular kai ban siew hynrei ka long pat da khongpong.
Kine ki Volunteer kila pynpaw ba ka sorkar kam suidniew satia ïa ka jingtrei shitom jong ki bad kane imat kim donkam shuh ïa ki Home Gaurd Volunteer. Te na kata ka daw kila pynpaw ba katba kim pat ïoh ïa bainong kaba kila dep trei kin ym shong klikti hynrei kin pynlong ïa ki jingïakhih nangne shakhmat, kumba ka sorkar ka kwah ïa ki tad haduh ba kin da ïoh ïala ka jong ka hok
