Rai ka sorkar jylla ban pynwai noh ïa ka jingthmu pynkylla surok 4-Lane na Umïam sha Shillong

Shillong, Jylliew 23: Ka Sorkar Jylla kala rai ban pynwai noh ia ka jingthmu ban pynkylla surok 4-Lane ia ka surok na Umiam Ri-bhoi District shaduh Shillong East Khasi Hills, ong u Symbud Myntri Rangbah ka Jylla ba dei peit ia ka tnat PWD (Roads), Bah Prestone Tynsong.
U Symbud Myntri Rangbah haba kren bad ki lad pathai khubor u la iathuh ba dang shen u la lum ia ka jingiaslang bishar kam ha nongbah Delhi hapdeng ka tnat National Highways & Infrastructure Development Corporation Limited (NHIDCL) ha ka jingdonlang ki ophisar ka tnat PWD (Road) ka Sorkar Meghalaya. U ong ruh ba ha ka kaiphod ba nyngkong ba la pynlong daka NHIDCL, ka kdew shai ba kam long satia ban pynkylla surok 4-Lane ia ka surok na Umiam Ri-bhoi District sha Shillong East Khasi Hills.
Katkum ka jingiathuh ong u, ka daw ka long ba ka jinglut kan jur bha lada pynkylla surok 4-Lane naduh Umiam sha Shillong bad dei namar kane ka Sorkar Jylla ruh ka la rai ban pyndam noh ia ka project hynrei yn shu pynheh ia ka surok 2-Lane kaba naduh Umiam sha Shillong.