Shillong, Nailar, 07: Kum shi bynta ban kyntiew ïa ka jingïalehkai Water Sports ka Sorkar Jylla Meghalaya ka la rai ban thied ïa ka jaka kaba heh 14 akar lyngba ka Meghalaya Industrial Development Corporation (MIDFC) ha wah Umtham, Ri Bhoi ban tei bad shna ïa ka jaka ïalehkai Water Sports kaba paka bad kaba thikna.
Kane ka projek ka thmu ban kyntiew ïa ki jingïalehkai water sport lane ki jingïalehkai ba pynlong ha um ha ka jylla, khamtam eh ïa ka Slalom, River Canoeing bad ka Kayaking.
Kane kan long ka course kaba marwei kaba kum kane ha ka ri baroh kawei ynda la dep shna pura ha kaba ïadei bad ki jingdonkam baroh kawei ban pyndep ïa ka,” la ong u Myntri Rangbah ka Jylla u Conrad Sangma sha ki lad pathai khubor hadien ka jingïalang jong ka kynhun myntri kaba la long hynne ka sngi Palei.
“Ka don kumba 14 akar ka jaka kaba kynthup kumba 8-9 akar ka jaka ban thung dieng ha shiliang ki surok kaba dang wan,” u la ong haba pyntip ba ka sorkar kan pynlut kumba 21 klur tyngka ban thied ïa katei ka jaka.
Katkum ka jingkheiñ, ka Meghalaya ka don ïa ka rekod kaba khlaiñ ha ki jingïalehkai water sports, da kaba jop san tylli ki takma ha ka National Games, kaba pynlong ïa ka sorkar ba kan shim ïa kane ka sienjam ban dang kyntiew shuh shuh ïa ki lad ba ka Jylla kan kiew shaphrang ha ka jingïalehkai Water Sports.
“Kumta, Ngi thrang bha ban kyntiew ïa kane bad katkum kata Ngi la rai ban tei ïa ka jaka ïalehkai kaba pura kawei ka jaka ïalehkai na ka bynta ka Slalom ha wah Umthan ha Ri Bhoi, la ong u MR da kaba bynrap, “Kane ka jaka kan long tang ma ka kaba kum kane ha ka ri, kaba ai ïa ka lad kaba kyrpang ïa ki nongïalehkai ban shah pyntbit bad ban ïakhun,” Sangma added further”.
