Rai ka Sorkar ban pynsted ïa ka kam shim jaka ban pynheh ïa ka Shillong Airport: Sniawbhalang

Shillong, Nailar 20: Ka sorkar jylla ka la rai ban pynsted ïa ka jingpyndep ban shim jaka na ka bynta ban pynheh ïa ka Shillong Airport project.
Haba kren sha ki lad pathai khubor ha ka sngi Balang, u Symbud Myntri Rangbah ba khmih ïa ka tnat Transport u Bah Sniawbhalang Dhar u la pynthikna ba kan don ka jingpynslem na ka liang ka sorkar halor kane, da kaba ong ba ka tnat bad ki ophisar ki la trei khlem shongthait ban pyndep ïa ka kam shim jaka.
Ka sorkar ka la mynjur ïa ka jingtyrwa ban shim ïa ka jaka 11.75 acre ka khyndew na ka bynta ban pynheh ïa kane ka kad liengsuiñ, ha ka jinglut kaba long T. 72.17 klur kaba la buh na ka bynta ki trai jaka.
Lah ban ong ba ka Airports Authority of India (AAI) ka donkam ka jaka kaba heh kumba 22 acre ban pynheh ïa kane ka kad liengsuiñ, bad ka tnat Defence ka la mynjur ban ai 10.3 acre hapoh ka leave-and-license basis.
U Bah Dhar u la ïathuh ba katba ïa ka jingkhot tender ka la ïaid bad kaba la plie, ïa ka kam yn dang hap ban aiti.
“Ka sorkar kan pyrshang ban pynsted ban pyndep kloi ïa kane ka kam shim jaka,” u la ong.
Kane ka expansion project ka thmu ban pynheh ïa ka runway na ka 1,829 meter sha ka 2,400 meter, ban pynlah ïa ki liengsuiñ kiba heh kum ki Airbus ban hiar khnang ba kan long ka lad ban pynïasoh sha kiwei pat ki nongbah kiba heh.