Rai ka sorkar ban pynsangeh noh ka rukom thungkam lyngba ka Interview hapoh ka Group-D

Shillong, Naitung 10: Kum shibynta na ka jingpyrshang ban wanrah ïa ka jingtreikam kaba shai bad kaba khuid ha ka rukom thungkam thungjam, ka Sorkar Jylla ka la mynjur ban pynsangeh noh ïa ka kam leh Interview ha ka thungkam ïa ki Group-D ha baroh kawei ka Jylla.
Ka sorkar ka iathuh ba kane ka rai kan treikam ha baroh kawei ka jylla ha kaba ïa kane la shim ha ka jingïalang ka kynhun Myntri ha ka sngi Palei ha Ïingsah u Myntri Rangbah ka Jylla.
Haba pyntip ïa kane ka rai, u Myntri ka Sorkar jylla u Bah Paul Lyngdoh ula ong ba kane ka rai ka dei kaba ïaid katkum ka policy ka Sorkar ban pynthikna ïa ka jingtreikam kaba shai ha ka thungkam thungjam bad kaba ïaid ruh katkum ka jingbthah na ka Tnad Personnel and Training, Ministry of Personnel, Public Grienvances and Pension.
U la ong, “Haba ïadei bad kane ka rai, baroh ki jingthungkam ha ki kam Group-D yn sa pynïaid noh khlem da donkam shuh ban pynlong ïa ki interview. Kane kan treikam naduh ka 1 tarik Risaw, 2025, kaba mut ba kan treikam noh nangne shakhmat.”
U Bah Paul u la ïathuh ruh da kaba ong, “Kane ka mut ruh ba baroh ki interview kiba la buh ban pynlong naduh ka 1 tarik Risaw mynta u snem la pynsangeh noh bad ki nongaplai kam kim donkam shuh ban shong ïa ka personal interview.”
Katkum ka jingïathuh jong u, u la ong ba kane ka rai kan ïarap ruh ban pynsted ïa ka jingthungkam ha ki kam bapher bapher bad pynthikna ïa ka jingshai bad jinglehhok haba ïadei bad ki kam thungkam sorkar.