Shillong, Naiwieng 05: Ka sorkar jylla ka la rai ban pynlong ïa ka anti-narcotic task force (ANTF), kum ka tnat pulit kaba la aiti ban ïakhun pyrshah ki kam khaïi drok beaiñ ha ka jylla.
Ïa kane la pyntip da u Myntri ka tnat Social welfare u Bah Paul Lyngdoh hadien ba la dep pynlong ka jingïalang bad ki nongmihkhmat jong ka seng Hynñiewtrep Youth Council (HYC) ha ka sngi baar.
Haba kren sha ki lad pathai khubor u Bah Lyngdoh u la pyntip ba ki mat kiba kynthup ba la pynpaw da ka sengbhalang bad kiwei ki seng hapoh ka imlang sahlang yn shim lang ban ïakren ha ka jingïalang ka ban sa long na ka bynta ka Drug Reduction Elimination and Action Mission (DREAM) ban pynïaid da u Symbud Myntri Rangbah ka jylla u ba khmih ïa ka tnat home (police) u Bah Prestone Tynsong ha ka 14 tarik u Naiwieng.
U la ong ba ha ka jingïalang yn ïakren ïa ki kam kiba lah ban pynlynkot katkum ka nongrim, ki don kito kiba long pdeng bad ki don kito pat kiba kham long jrong.
Haba ong ba ka sorkar ka la shim khia ban ratdiengkhong ïa ka kam khaïi drok, u Myntri u la ong ba ka jingïalang ka ban long ha ka 14 tarik u Naiwieng kan sa don ka jingkhmih kaba thymmai kumno ban ïakhun ïa kane ka jingeh.
“Kan don khambun ka jingpynleit jingmut halor ki rukom treikam bad ka jingdonkam ban pynkhlaiñ ïa ka ANTF. Ngin buh ruh ka thong bad ban peit ban pynlong ïa ka ANTF ka tnat pulit kaba aiti kaba ym dei ban shah pyrkhing ha ki kam kiba ju leh manla ka sngi bad dei kane kaei kaba la jia kat haduh mynta,” u la ong.
Ha kawei pat ka liang ka HYC ka la aiti ïa ka dorkhas sha u Myntri kaba la pynpaw ïa ka jingdonkam ki jaka sumar bad ki rehabilitation centre kiba heh, nangta ka free detoxification, OST bad ki day care centre, ka jingbuh ïa ki fast track court ne special court, ka jingdonkam ka jingtohkit bad ki jingpynshitom kiba hab hapoh ka NDPS Act, ka jingkhang lad ïa ka kam khaïi kaba dei hapoh ka PITNDPS Act, 1988, bad ka jingbuh ïa ka ophis narcotic control board (NCB) ha Shillong.
Haba ong ba ka jingïalang bad ka HYC ka la long kaba bha, u Bah Lyngdoh u la ong, “Nga la ïoh ka lad ban batai ïa ki nongïalam ka seng HYC ba ha kaba nyngkong eh ka sorkar jylla ka la thung ïa u mission director ba thymmai u Bah F G Kharshiïing IPS ba la shongthait ban khmih ïa ki kam jong ka DREAM bad u la shimti ïa ka kam ha ka 7 tarik mynta u bnai.”
U Bah Lyngdoh u la ïathuh ruh ba u la dep ban ïakren bad u Symbud Myntri Rangbah uba khmih ïa ka home (police) u Bah Prestone Tynsong ha ka sngi Nyngkong naba kane ka kam drok ka kynthup lang ïa kiba bun ki tnat sorkar. Kane ka don ka jingïadei bad ka tnat home (police), social welfare, health, law bad kiwei kiwei,” u la bynrap.
Shuh shuh u Bah Lyngdoh u la ong ba kiwei pat ki kam kiba kynthup ïa ki de-addiction centre ne rehabilitation centre, na ka liang ka sorkar ka la long kaba shai ba ka kwah ban don bun kum kine ki centre hynrei donkam ïa ki nongshong shnong bad ki bor pynïaid shnong ban wan shakhmat.
“Kawei ka kam kaba heh kaba ym lah ban long katkum ki rukom pynïaid kam jong ka central ministry ka dei ka jingïoh ïa ka jaka. Kam don ka kyndon ban thied ïa ka jaka, kumta donkam ïa ki bor pynïaid shnong bad ki nongshong shnong ban wan shakhmat ban synniang ïa ka jaka khnang ban lah ban buh bun kine ki centre,” u la ong.
Ha kawei ka liang u Bah Paul u la ong ba un sa leit ban kynduh ïa kiba bun ki myntri kiba don ha ki ministry ka sorkar pdeng ha New Delhi ha ka 17 bad 18 tarik mynta u bnai.
“Ki don haduh 5 tylli ki ministry, kiba don ka jingïasoh bad kane ka tnat social welfare,” ong u Bah Paul.
