Shillong, K’ Lyngkot 16: Ka Sorkar Jylla ha ka sngi Thohdieng ka la pynjlan ïa ka jingshakri jong u Superintendent Engineer K Wahlang ha ka Directorate of Urban Affairs, na ka bynta lai bnai.Hadien ba pynïaid ïa ka jingïalang ka Kynhun Myntri u Myntri Rangbah Conrad K Sangma ula ong, “Ka la don ka jingpynjlan ïa ka jingshakri jong uwei u Superintendent Engineer ha ka Directorate of Urban Affairs na ka bynta lai bnai. Ka jingshakri u Bah K Wahlang la pynjlan namar kiba bun ki project ba mynta kila treikam bad kan ktah ïa ka jingtreikam kine ki project kiba la ïaid.”
U Myntri Rangbah ula batai ba ka jingpynjlan ka dei kaba donkam na ka bynta ban pynthikna ïa ka jingïaid beit ïaid ryntih ka jingpyntreikam ïa ki project kiba la sdang.
Ka Sorkar ka la rai ruh ban aikam bad pynjlan ïa ka jingshakri jong arngut ki Ophisar ba la shongthait- Bah Robert Lyngdoh kum u Officer on Special Duty and Ex-Officio Secretary ka tnad Planning bad ha ka Meghalaya Age Limited lem bad u Bruce P Marak kum u Nongaibuit ka Meghalaya Integrated Transport Project, ka World Bank Project.
U Myntri Rangbah u la ong, “Ngi la rai ban pynjlan ïa ka jingshakri u Bah Robert Lyngdoh bad Bruce P Marak, kiba dei ki Chief Engineer ba la shongthait.”
