Shillong, Jymmang 14: Ka Sorkar Jylla kala rai ban maramot noh ïa palat 1000 tylli ki Ïingskul, kiba la jot la pei hapoh une u snem ba mynta.
Haba pyntip ïa kane, u Myntri ka tnad pule puthi ka Jylla ula ong “Ngi la pan ïa ka kaiphod kaba bniah bad bala leh janai namar ka thong jong ngi ka long ba haduh 1000 tam ki skul yn maramot ha une u snem ba mynta”.
Kat kum ka jingong jong u, ka jinglut jingsep na ka bynta kane ka kam yn sa lah ban tip hadien bala ïoh pdiang ïa ka kaiphod kaba pura bad ong “Lada ngim lah ban leh tang shisien leh, ngin sa plan ban leh da ki kylla kylla kumba ar kylla ne lai kylla”.
Ha ka 29 tarik Ïaiong, u ma Lahkmen ula pan ïa ka kaiphod haba ïadei bad ka jinglong jingman jong ki hynñiew tylli ki skul sorkar kiba hap hapoh Mawsynram Block bad South West Khasi Hills District.
Haba kylli halor ka sienjam bala shim halor kane ka kam, u Myntri ula ong ba ka Tnad kala pan ïa ka kaiphod ym tang ïa kine ki 7 tylli ki skul hynrei ïa kibabun ki skul hapoh ka Jylla.
U ma Lahkmen u pyntip ba bun na ki Sub Divisional School Education Officer (SDSEO) kila dep ban aiti ïala ki jong ki kaiphod halor ki skul kiba la jot la pei hala ki jong ki jong ki pud treikam khnang ba ka Sorkar kan lah ban leh eiei hapoh une u snem ba mynta.
“Ka dei ka plan jong ka Sorkar ba baroh ki skul sorkar ki dei ban ïoh ïa ka song pisa namar don ki skul kim don kam satia ïa ki Ïingskul thymmai hynrei tang ki jingmaramot ba malu mala” ula bynrap.
U Myntri ula ïathuh ruh ba ka kaiphod kaba bniah ban sa ïoh, kan nang ai jingshai shuh ïa ka Tnad ba kumno kan leh khnang ba ki khynnah skul kin nym duh ïa ki jingpule.
“Naba ngi kwah ïa ka kaiphod kaba bniah bha, shen ngin sa ïohpdiang ïa kane ka kaiphod bad ngin sa lah ban ïathuh ha phi ba haduh katno tylli ki skul kin ïoh ïa ka song pisa ban maramot bad ki dei na kiei ki District: ula ong.
