Rai ka Sorkar ban kyntiew kyrdan 6 ki skul Sorkar, 11 tylli kin ïoh Stream thymmai

Shillong, Jymmang 01 : Ka sorkar jylla ha ka sngi Palei ka la shim ïa ka rai ban kyntiew kyrdan Higher Secondary ïa 6 tylli ki Secondary School jong ka sorkar khnang ba baroh ki khynnah ba pass ïa ka Matrik mynta u snem kin ïoh ban rung klas lut.
Lah ban kdew hangne ba ka jingdon haduh 87.10 persen ka jingpass ki khynnah ha ka result Matrik ba pynbna da ka Meghalaya Board of School Education (MBoSE) ka la pynlong ïa ka jylla ban sakhi haduh 55,473 ngut ki khynnah kiba pass ïa kane ka eksam mynta u snem.
Haba kren bad ki lad pathai khubor hadie ka jingïalang jong ka Kynhun Myntri, u nongai ktien jong ka sorkar jylla, Bah Paul Lyngdoh u la ïathuh ba ka jingbun ki samla pule ba pass ka la pynlong ïa ka jylla ban sakhi ïa ka jingduna haduh 12,000 tylli ki seat na ka bynta ka klas XI. Dei na kane ka daw ba ka sorkar ka la shim ïa kane ka sienjam ban kyntiew kyrdan ïa ki 6 tylli ki skul Secondary bad ki Public School jong ka sorkar.
Nangta u la ïathuh ruh ba nalor ba la kyntiew kyrdan ïa ki Secondary School sha ki Higher Secondary, ka sorkar ka la shim ruh ïa ka rai ban buh thymmai ïa ki stream bapher bapher ha kiwei pat ki skul jong ka sorkar na ki stream kiba la don lypa. Katkum ka jingong jong u, ki don ki skul Higher Secondary kiba don tang ka Arts Stream hynrei mynta ka sorkar jylla ka la pynkha lang sa ka Science bad Commerce Stream.
U Myntri u la ïathuh ruh ba da ka jingmynjur jong ka kynhun myntri ïa ka jingtyrwa jong ka Education Department, yn sa donkam ban thaw haduh 137 tylli ki kam nonghikai ha kine ki 17 tylli ki skul.
Katkum ka jingïathuh jong u, ki skul kiba la kiew kyrdan na ka Govt. Secondary sha ka Higher Secondary ki kynthup ïa ka Rymbai Govt. Secondary School, East Jaintia Hills District kaban don ïa ka Arts Stream, nangta ka Umthlong Nongthliew Govt. Secondary School kaban don ïa ka Arts bad Science Stream, ka Nongtalang Govt. Secondary school, Nongtalang kaban don ïa ka Arts bad Science Stream, kumjuh ka Tirot Singh Memorial Govt. Secondary School, Laitkynsew sha ka Arts & Science Stream.
Ha kajuh ka por, la ïathuh ba ki Public School kiba la kyntiew na ka Secondary sha ka Higher Secondary ki kynthup ïa ka Tura Public School kaba la buh ïa ka Arts & Science (CISCE) bad ka Jowai Public School kaban don ïa ka Arts (CISCE).
Nalor kine, kiwei pat ki skul kiba la pynkha ïa ki stream ba thymmai ki long ïa ka Tirot Singh Memorial Govt. Higher Secondary School, Nongkhlaw kaba la ïoh mynta sa ïa ka Science Stream na ka Arts Stream ba ka don baroh shi katta.
Ka Jirang Govt. Secondary School, Ri-Bhoi District kaba don mynshwa tang ïa ka Science Stream mynta pat ka laïoh sa ka Arts, katba ka Govt. Boys HS School Tura ka la ïoh ïa ka Commerce watla baroh shi katta ka don tang ïa ka Arts & Science.
Ka United Kharkutta Govt. Higher Sec. School, North Garo Hills kaba don mynshwa tang ka Arts hynrei mynta ka la ïoh sa ïa ka Science bad Commerce. Katba ka Mallangkona Govt.HS kaba don tang ka Arts baroh shi katta mynta pat ka la don sa ïa ka Science.
Katba ka Dalu Govt. HS West Garo Hills kaba don baroh shi katta ïa ka Arts & Science stream mynta pat ka la ïoh sa ïa ka Commerce stream, katba ka Resubelpara Govt. Higher Secondary School,Resubelpara kaba don tang ka Science Stream baroh shi katta, mynta pat ka la ïoh sa ïa ka Arts stream.
Katba ka Baghmara Govt. Higher Secondary School, Baghmara kaba don ïa ka Arts & Science baroh shi katta mynta pat ka la ïoh sa ïa ka Commerce stream, katba ka Govt. Boys’ Higher Secondary School, Jowai kaba don baroh shi katta tang ïa ka Arts bad Science Stream mynta pat ka la ïoh sa ïa ka Commerce stream.
Ka Sohkha Govt. Higher secondary School, Sohkha pat kaba don baroh shi katta tang ka Arts & Science stream mynta pat kan ïoh ban donlang sa ka Commerce stream. Ha kajuh ka por ka Maharam Govt. Higher Secondary School, Mawkyrwat kaba don tang ka Science stream baroh shi katta mynta pat ka la ïoh sa ïa ka Arts Stream.
U Myntri u la pyntip ruh ba ka jingktah ïa ka pla tyngka jong ka sorkar da kaba kyntiew kyrdan bad pynkha ïa kine ki lain jingpule ba thymmai ha ki 17 tylli ki higher secondary school kan kot sha ka 10.81 klur tyngka (10,81,97,550.00) ha ka shisnem.
Lah ban kdew hangne, ka sorkar jylla ka la ïoh ïa ka jingkyrshan lang jong ki jaka pule jong ki riew shimet kiba la rai ban pdiang kham bun shuh shuh ki khynnah klas XI na kaba ju shim baroh shi katta snem. Kane ka sienjam ba la shim da I 96 tylli ki jaka pule jong ki riew shimet ka la ïarap ban pynrung thymmai haduh 9000 ngut ei ei ki khynnah klas XI mynta u snem bad ïa kaba tam pat la pynrung da kaba kyntiew kyrdan ïa kine ki skul jong ka sorkar.