Shillong, Nailur, 12: Ka Sorkar Jylla ka la rai ban ïasoi thymmai da ka public-private partnership (PPP) mode na ka bynta ban tei ïa ka Shillong medical College kaba la khmihlynti la slem.
“Ïa ka Medical College ban ïasoi da ka PPP mode ka la ïaid shakhmat bad ngi dang ïakren bad ki katto katne ki Agency hadien ba la pyndam noh ïa ka soskular baladep ïasoi bad ka KPC group ha u snem 2012,” la ong u Myntri Rangbah ka Jylla u Conrad K. Sangma haba jubab ha ka Dorbar Synrai jong ka Ingdorbar Thawaiñ ka Jylla ha ka Lah Sngi u Blei.
“Ka jingïakren ka dang shu sdang bad ki ar tylli ki Agency bad ngi khmihlynti ba kane ka kam kan sa urlong noh kham kloi,” la ong u Sangma,
Haba pynpaw ba ka PPP mode ka dei kaba kongsan na ka bynta ka Medical College namarba ka jingbei pisa kan wan na ki Private Partner, u Myntri Rangbah ula ong, “lada ka Sorkar ka bei pisa kin don katto katne ki Seat kiba wan sha ngi hynrei ha kaba kut ka sngi, ka jingpynïaid ïa ka Medical College ka long kaba kongsan ïa kaba dei ban leh ha ka rukom kaba dei bad kaba kham kongsan shuh shuh ka long ka long ha kaba ïadei bad ka jingpynlut pisa ha kaba pynïaid ïa ka Medical College. Kine ki dei ki katto katne ki daw kiba kongsan ba ngi dei ban buh jingmut haba ngi pynsdang ban pyntyllun shakhmat ha kaba wanrah ïa ka Medical College.”
U la ong ba katkum ka PPP mode kin sa don ruh ki kyndon bad ki Agency ïa kiba ngi dang ïakren ha kaba ïadei bad ka jingbei pisa kan long na ka Sorkar Jylla ruh, ha ki katto katne ki bynta tang ïa ka jaka yn ai da ka Sorkar Meghalaya bad bun ki Seat yn sa ïoh da ki briew jong ngi bad ka Sorkar Jylla kan sa lah ban ai sha ki samla pule ïa ka jingjied ban sa pynlong da ka Sorkar Meghalaya.
Da kaba pynpaw ba ka jingpynïaid ïa ka Medical College da ka Sorkar ka dei ka kam kaba jwat, u Myntri Rangbah u la ong, “nga ju ïai kren barabor ka thong jong ka Sorkar ka long ban long ka nongthaw ïa ki polisi, kaba peit ïa ka synshar ka khadar, ka jingpynmih pisa, ban shna ïa ki jingtei ba dkiwei kiwei bad kine ki dei ki bynta kiba ngi hap ban khmih bniah.
