Rai ka Shnong Panaliar ban daiñ kuna 10 hajar ïa kiba kwai dohkha ha Fish Sanctuary

Jowai, Naitung, 27: Ka shnong Panaliar hadien ba ka la shimti pura ïa ka “Syntu Ksiar Fish Sanctuary” kaba don ha ka Wah Myntdu, ban peit bad pynïaid hi ïa kane ka jaka, kumta ka la aiti noh ha ka Panaliar Tourism & Environmental Development Society (PTEDS), ban pynïaid ïa baroh ki kam.
Ha ka jingleit jurip jong ka Society ha ka sngi Saitjaiñ halor ka jingïoh ujor na kiba bun balang ba don kiba khwai dohkha na kylleng ha ka thwei ba pynlong kum ka jaka ba pynneh pynsah ïa ki dohkha.
Kumta ka Executive Committee jong ka shnong da ka mynsiem ba sngewkhia, ka la shim ïa ka rai ban pynshitom da kaba daiñ kuna T. 10,000 hajar ïa kino kino ki briew kiba khwai dohkha ha kane ka jaka ba la khang pyrshah da ka shnong.
Ka la pyntip ba ka shnong kan ai buskit T. 5,000 hajar ïa kiba ai jingpyntip shaphang ki nongleh pyrshah, khlem da pynmih ïa ka kyrteng ki nongpyntip. Kiba shah kem ne kiba leh prshah kin shah daiñ kuna kumjuh ruh kin shah set phatok ryngkat ki kyndon aiñ, la ong u Waheh Shnong ka Panaliar u Bah Riquoma Rq. Laloo.
Ka Shnong Panaliar, ka la kyntu ïa baroh lang ban ïatreilang naduh ka jingkhuid jingsuba sha ki rud jong katei ka jaka jong ka wah bad kyntu ruh ban peitngor ïa ki nongkhwai kiba leh pyrshah ne ïa kino kino kiba wan ban pynjaboh da kaba pyntip sha ka shnong khlem kano kano ka jingtieng, namar ka bor shnong kan don lang bad ki.
Ka Shnong Panaliar ka kyntu ruh ïa kiba najan bad na jngai ban kheiñ kor ïa ki sawdong sawkun jong ka mei mariang ban ym pynjot pynpra ne ban pynjaboh ïa ki sawdong sawkun jong ka mariang.
Ka shnong ka khot ïa ki nongwan jngohwai da ka mynsiem kaba kylluid hynrei ka khang pyrshah ïa kito kiba don ka mynsiem ban pynsniew ne ban leh ïa ki kam ba la mana ban leh pyrshah.