Rai ka RBDCC ban ïa khih tyngeh beit halor ka jingpynkylla kyrteng ka BJP ïa ka skhim MGNREGA

Nongpoh, K’lyngkot 10: Da kaba kynnoh halor ka jingleh donbor ka sorkar BJP, ka Ri Bhoi District Congress Committee (RBDCC) lem bad ka Meghalaya Pradesh Congress Committee (MPCC) lyngba ka jingbthah na ka All Indian Congress Committee ba la wan rah da ka MGNREGA Sangram Prorgramme, ki la rai beit ban ïa khih paidbah na ka bynta ban pyrshah jur ïa ka sorkar BJP ba la kynnoh ba ka la pynkyla kyrteng jubor ïa ka skhim MGNREGA sha ka Viksit Bharat – Guarantee For Rozgar and Ajeevika Mission Gramin, Act 2025, (VB-GRAMG Act 2025).
Kumba la pynpaw da ki nongïalam ka Congress lyngba u District President ka Ri Bhoi District Congress Committee u Bah Rocky Marwein bad u Vice President ka Meghalaya Pradesh Youth Congress u Bah Jonathan Syiem, ki la ong ba kin ïa bud ryntih katkum ka jingbthah ka AICC ban pynlong ïa ka jingïakhih ne ka jingïapyshah jur halor kane ka jingpynkylla kyteng jubor ïa ka skhim MGNREGA sha ka Viksit Bharat – Guarantee For Rozgar and Ajeevika Mission Gramin, Act 2025.
Ki la pynshai ruh ba kane ka jingmih ban ïa khih ne pyrshah ka dei ruh katkum ka rai ha ka jingïalang kaba la long ha ka 8 tarik ha Congress Bhavan, ba ka party Congress ka la rai ban ïa khih ne pyrshah ha man la ki District ha ka jylla na ka bynta ban pyrshah jur halor kane ka jingpynkylla ïa kyrteng ïa ka skhim MGNREGA kaba dei ka skhim ba la pynthikna ïa ka jingïoh kam ïoh jam ki paidbah haduh 100 sngi ba la mang pisa beit na ka sorkar kmie.
Ki la pynpaw ruh ba ka sorkar Congress ka la wan rah ïa kane ka skhim lane ka Act ha u snem 2005 na ka bynta ban saindur ïa ki kam pynroi sha ki shnong nongkyndong bad ruh ba la don ki jingkylla bapher bapher sha ki shnong nongkyndong, hynrei dei haduh u snem 2014 ba la synshar ka sorkar BJP ba ka BJP ka la sdang ban mushlia ïa ki kam pynroi ba wan rah ka Congress bad mynta ka BJP ka la nud wat ban pynkylla kyrteng ïa kane ka skhim ba ki nongshong shnong ka ri India hi baroh kawei ki la ïoh jingmyntoi.
Ki la ther tyngeh ruh naduh ba la shimti ka sorkar BJP ha ka ri, ka rukom treikam ïa kane ka skhim ruh ka la kylla noh ha kaba mynta bun ki shnong ki thaw ki sah rah sah shah, na ka daw ka jingbym lah ban pynlait pisa ha ka por kaba biang bad mynta ka sorkar BJP ka la nud ruh ban thom bor wat ban pynkylla kyrteng bad wan rah ki kyndon bapher bapher kiba la pynjynjar ïa ki paidbah nongshong shnong ha ki shnong nongkyndong.
Na ka liang kine ki nongïalam ka Congress, ki la buh ruh ïa ka jingdawa ïa ka sorkar BJP ba ka dei ban pynlait lut noh ïa baroh ki pisa ba dang sahteng ba bun ki shnong ki sah ram sah shah ba kynthup ïa ka jingthied ïa ki tiar ki tar (Materials) bad ruh ka bai bylla sngi ki nongbylla sngi (Wages) kaba la ktah shisha ïa ki nongshong shnong ha ki shnong nongkyndong kumba la pynkup bor lyngba kane ka skhim lane ka Act ba la wan rah da ka sorkar Congress.
Namarkata, kitei ki nongïalam ki la kren shai ba kin nym kyrdan dien halor kane ka jingpynkylla kyrteng ka BJP ïa kane ka skhim bad ki la khot la wer ruh ïa ki paidbah nongshong shnong ka jylla ban ïa snoh kti lang bad ka party Congress na ka bynta ban pyrshah ne ïa khih paidbah halor kane ka jingthombor ka sorkar BJP ban pynkylal kyteng ïa kane ka skhim kaba long shisha ka jingduhnong ïa ki shnong nongkyndong, ki la bynrap.