Rai ka PDF ban pynïakhun da u Bah Roswel Shadap na Mawhati Constituency

0

Nongpoh, Ïaïong 02: Kum ka jingpynkhreh ban ïa khun na ka bynta ka election 2023 hapoh ka jylla, ka party PDF mynta ka sngi ka la sdang shuwa ban pynskhem ïa ki nongïalam na Mawhati Constituencu bad ha kajuh ka por ruh ka la pynbna ba u Bah Roswel Shadap un long kum u kyrtong ka PDF ha kane ka election 2023 na ka Mawhati Constituency.
Haba pynskhem ïa ki nongïalam ka People Democratic Party (PDF) ha Mawhati la pynlong ïa ka jingïalang ha ka shnong Mawpat ba hap ha ka Mawhati Constitueny bad palat spah ngut ki paidbah kynthei bad shynrang ki la wan ban sakhi ha kane ka jingpynskhem ïa ki nongïalam ka PDF Mawhati Zone.
La wan ruh ban pynskhem da u President ka PDF Sengkmie bad uba dei ruh u Mytri sorkar ka jyla, u Bah Banteidor Lyngdoh ha ryngkat ka jingdon lang kiwei ki nongïalam na ka seng kmie ba kynthup ïa u Bah J.B Basaiawmoit, Vice President ka PDF Sengkmie, u Bah A.L Nonglait, Finance Secretary ka Sengkmie, u Bah Dipshon Ryntathiang, President ka PDF Ri Bhoi District, u Bah Joseph Makdoh, President barim ka PDF na Mawhati bad kynthup kiwei kiwei ki nongïalam na ka seng kmie bad kito kiba rung thymmai na Mawhati Constituency.
Ha kane ka sngi nalor kitei ki nongïalam ka PDF na sengkmie bad na Mawhati Constituencu la sakhi lang ruh da ka jingdon lang ki rangbah shnoing bad ki paidbah kynthei bad shynrang kiba la wan ban lumlang ha katei ka Madan ha ka Shnong Mawpat kaba ki la pynpaw ba kin ai kata ka jingkyrshan ïa ka PDF khamtam ïa u Bah Roswel Shadap kum u kyrtong ka PDF na Mawhati Constituency.
Ki nongïalam ka PDF na Mawhati Zone ki kynthup ïa u President, Kynpham Mynsong, Vice President, Dwes Madur, Shemphang Pale, Ledan Khymdeit, Jros Madur, General Secretary, Kytingdor Khymdeit, Adviser, Joseph Makdoh, Roswell Shadap bad kiwei kiwei ki nongïalam.
Ha kane ka sngi la pynskhem ruh ïa ki nongïalam ka Youth Wing ka PDF na Mawhati Zone ba kynthup ïa u President, Francis Kurbah, Vice President, Michael Marten, Genera Secretary, Ïaishah Masynting, Assistant Secretary, Shain Suphai, Organizing Secretary, Embhah Mynsong bad kiwei kiwei ki nongïalam bad ki dkhot ka Youth Wing.
Haba ai ïa ka jingkren kyllum kitei ki nongïalam naduh u Bah Banteidor Lyngdoh, uba dei u President ba rangbah ka PDF, u Bah Roswell Shadap bad kynthup ruh ki nongïalam na ka seng kmie ba kynthup ïa u Bah J.B Basaiawmoit bad au Bah A.L Nonglait, ka phang kaba hakhmat eh kaba ki la kren ka long ban pynkhlain ïa ka party PDF ym tang ha Mawhati Constituency bad ha ka jylla hi baroh kawei.
Ki la pynpaw ruh ba la seng ïa ka PDF ruh kaba dang ïaid lynti tang 5 snem ei ei ka dei halor ka nongrim ban peit kyrpang ïa ka jingeh ka jaid bynriew bad ym ba ki riew don spah don phew kin shu lehkai ïa ka jingim ki paidbah ka la ka long ha kano kano ka kam jong ka imlang ka sahlang bad ki kam pynroi pynpar.
Lyngba jong kane ka sngi ki la shim ruh kawei ka rai ba kin dang pynkhlain ïa ka party ha Mawhati Constituency bad ki don ruh ka jingangnud ban wan ka jingkylla, namar kumba la pynpaw da ki nongïalam katei ka thain ki la shah iehnoh khunswet ha ki nongmihkhmat khamtam u MLA uba la sangeh ruh wat ban ïa khun ïa ka election wat la ki paidbah ki la pynjop don burom ïa u ha ka election ba la dep.

Leave A Reply

Your email address will not be published.