Shillong, Nailur 26: Ki nongtrei Garo Hills Autonomous District Council (GHADC) hapoh ka lama Non-Gazetted Employees Association (NGEA) ha ka sngi Thohdieng, ki la pynbna ïa ka rai ban pynsangeh shipor ïa ka jingïakhih kaba la sdang naduh u bnai Naitung 2025.
Ka NGEA kala sdang ïaka jingïakhih nyngkong na Gandhi Park bad kham hadien ka la kynriah noh sha ka jaka jong ka ophis treikam ka GHADC ha kaba ka jingïakhih kala nang jur hadien ka jingwan ïasoh daki katto katne ki kynhun sengbhalang ban pynbor ïaka District Council ban pyllait iaka tulop jong ki nongtrei kaba la sahteng la palat 43 bnai.
Kane ka rai ban sangeh shipor ïaka jingïakhih ka wan hadien ka hukum jong ka High Court ha ka 24 tarik Nailur kaba la bthah ïa u Superintendent of Police (SP) ban pynthikna ba ïa ka jaka treikam jong ka GHADC kadei ban nym dei ka jaka ïakhih da ki nongtrei.
Hadien ka hukum jong ka High Court, u SP ka West Garo Hills u la khot ïa ka jingïalang bad ki nongïalam ka GHADC ban wad da kawei pat ka jaka ban pynlong ïa ka jingïakhih.Haba ïadei bad kane u president ka NGEA u Brithen M Sangma u la ong “Ngi la don ka jingïalang bad ngi la shim da kawei ka rai ban pynsangeh noh shipor ïa ka jingïakhih bad ngin sdang leit phai biang shala ki kam naduh ka 6 tarik Risaw.”
Haba kylli, u Brithen u la pyntip ba ka NGEA kan pdiang ïa ka jingïarap jong ka Sorkar Jylla ban pynkhuid noh ïaka tulop na ka bynta 12 bnai.Naka liang ki nongtrei ki la pynthikna ba kin pynkhuid shwa iaka ophis jong ka GHADC kaba la sah khlem pyndonkam la katto katne bnai hashuwa ban leit trei biang.
