Rai ka NERPC ban kyntu ïa ka Ministry of Power ban pynkhlaiñ pynmih bording elektrik ha NE

Nongpoh, Lber 28: Da ka jingthmu ban pynbiang ïa ka bording lane ban dang pynmih shuh shuh ïa ka bording ban pyndap katkum ka jingdonkam ki paidbah ha ki jylla ba hap ha ka thain Shatei Lam Mihngi ka ri India, ki heh sorkar bad ki ophisar bapher bapher na ki jylla ka thain Shatei Lam Mihngi mynta ka sngi ki la pynlong ïa ka jingïakynduh lang lyngba ka North East Regional Power Committee ha Vivanta Hotal, Guwahati ban ïa tai ne ïa thir halor ki lad ban kyntiew ïa ka kam ban dang pynmih bun shuh shuh ka bording Ilektrik ha kine ki jylla ka thaiñ Shatei Lam Mihngi ka ri India.
Kane ka jingïakynhuh lang la tip ruh kum ka ‘22nd North East Regional Power Committee’ lane ka Forum ha kaba lyngba ka Ministry of Power bad ryngkat ka jingbei tyngka ka North Eastern Electric Power Corporation (NEEPCO) la pynlong ïa kane ka jingïakynduh lang ki heh sorkar ne ki Myntri ba dei peit ïa ka tnad bording na ki jylla ka thaiñ Shatei Lam Mihngi ban ïa tai sani ïa ki lad ban dang pynkhlaiñ ïa ka kam ban pynmih bording.
Ïa kane ka jingïakynduh lang la wan shim bynta ruh da u Myntri rangbah ka jylal Nagaland bad uba dei ruh u Chairman ka North East Regional Power Committee, u Sh. Neiphiu Rio , u Symbut Myntri ka sorkar Meghalaya bad uba dei ruh u myntri ba peit ïa ka tnad bording, u Bah Prestone Tynsong bad kiwei kiwei ki myntri ka tnad bording na I jylla ka thaiñ Shatei Lam Mihngi ka ri.
Ha kane ka kynti kane ka jingïakynduh lang ka dei ruh ha ka jinglong Chairman u Sh. Neiphiu Rio, uba dei u Myntri rangbah ka jylla Nagaland, uba la pynpaw ba lyngba kane ka Committee kin ïa kren sha ka Ministry ka tnad power ka sorkar India ba kan pynbiang ïa ki jingdonkam ban kyntiew na ka bynta ban dang lah ban pynmih shibun ka bording ban pynbiang katkum ka jingdonkam ki paidbah hapoh ka jylla ka thaiñ Shatei Lam Mihngi.
Haba kren ruh ha kane ka sngi, u la ong ba ka forum lyngba ka NERPC ka dei kaba biang tam ban ïa trei ryngkat lane ban shim ïa ka rai ban ïa kren halor shibun ki phang kiba dei ka jingeh ki paidbah na ka daw ka jingdonkam ban dang pynmih bording ha ki jylla bapher baher ba hap ha ka jylla shatei Lam Mihngi ka ri India.
Kumba la ïa kren bad ïa tai ruh ha kane ka sngi ka phang kaba ki la kham ban khia ka long pynbit pynbiang ïa ka bording ha kine ki jylla ka thain shatei Lam Mihngi ka ri India lyngba akta ka North East Region Power System Improvement Project (NERPSIP) kaba dei lyngba ka sorkar India, ban dang pynheh ne pynkhlain shuh shuh ïa kita ki transmission networks, ban dang pynheh ne pynkhlaiñ ïa ka jingïadei halor ki kam pynmih bording ilektrik (expansion of reliable communication) ban dang pynbun kita ki jaka pynmih bording ba la tip kum ka (Hydro plants) bad kiwei kiwei ki jingeh ba ki jylla ki ïa kynduh halor ka jingduna ka bording ilektrik.
Na ka liang u Myntri Rangbah ka Nagaland bad uba dei ruh u Chairman ka NERPC u la kyntu ïa ki sorkar jylla ka thaiñ Shatei Lam Mihngi ka ri India ban pyndonkam hok ïa ki skhim sorkar na ka bynta ban pynkhlaiñ ïa ka jingpynmih bording ba la tip kum ka ta ka Revamped Distribution Sector Scheme (RDSS) na ka sorkar kmie lyngba ka Ministry of Power bad kumjuh ruh ban dang pynkhlain ïa ka jingsam bording sha ki paidbah ba la tip kum kata ka (Distribution network and capacity building jong ka DISCOMS & ka tnad ba pynmih ïa ki bording ilektrik.
Haba kren ruh ha kane ka sngi u Bah Sh. B. Lyngkhoi, u Convener bad u Member secretary ka NERPC u la ong ba ki jylla ka thaiñ Shatei Lam Mihngi ka ri India ka long ka thaiñ kaba ioh ïa ka jingkyrkhu namar ki dei ki jylla ba lah ban pynmih shibun ki bording bad u la kyrpad ruh lyngba kane ka Committee ban dang pynkhlain shuh shuh ïa kita ki Transmission Network bad ruh ban pynmih shibun ki jaka ba lah ban dang pynmih ïa ki bording lyngba kata ka Hydro Power.
Ha kane ka sngi ba la don lang ruh u symbut myntri ka sorkar jylla, u Bah Prestone Tynsong bad uba dei ruh u myntri ba peit ïa ka tnad bording ha Meghalaya, haba kren ha kane ka sngi u la pynpaw ka jingkmen halor ka jingdon kane ka North East Regional Power committee ban ïa kren halor ka jingeh ki jylla kiba ktah na ka jingduna ki bording ilektrik bad u khmih lynti ruh ba lyngba akne ka Committee kin dang lah ban dan ïa kren halor shibun ki bynta kiba ngi lah ban pynkhlain ïa ka jingpynmih bording ban pyndap katkum ka jingdonkam ki paidbah ha kine ki jylla ba hap ha ka thaiñ Shatei Lam Mihngi ka Ri India.