Rai ka NEHU bad ki Principal jong ki College bad jaka pule ban pdiang ïa ka CUET

0

Shillong, ïaïong, 21: Ka jingïalang ba la khot pynlong da ka North Eastern Hills University (NEHU) bad ki Principal lem bad ki Khlieh pynïaid jong ki jaka pule ha ka sngi Palei ki la shim ïa ka rai ban pdiang ïa ka jingpynlong ïa ka Common University Entrance Test (CUET)-2022.
Ha kane ka jingïalang la sakhi lang da u Myntri ka tnat Pule Puthi ka Sorkar Jylla u Bah Lahkmen Rymbui.
U Vice Chancellor ka NEHU Prof. Prabha Shankar Shukla ha ka jingïakren bad ki lad pathai khubor u la ïathuh ba kane ka jingïalang da kawei ka sur ka la shim ïa ka rai ban pyntreikam ïa ka CUET-2022.
U la ong ruh ba kin sa pyrshang ban ïakynduh lang ban ïathir ïatai ïa ki jingeh kiba lah ban mih khnang ban dup lah ban weng mardor.
U Public Relations Officer (PRO) jong ka NEHU Bah David Pyngrope u la ong ba ka Sorkar Jylla ruh ka la kyrshan ïa kane ka rai namarba kan long ka jingmyntoi hi ïa ki samla pule jong kane ka jylla hadien habud.
Katkum ka jingong jong u Bah Pyngrope, baroh ki samla pule kiba angnud ban ïoh jaka pule ha ki College kiba ïateh bad ka NEHU kin hap ban thoh ïa kane ka CEUT.
U la ong ruh ba kane ka rai ba pynlong ïa ka CUET-2022 ka dei kaba la pynmih da ka University Grants Commission (UGC) bad bynrap ba ka University ka hap ban shu pyntreikam tang ïa ka jingpynbna ba la phah da ka UGC.
Ha kawei pat ka liang, u Principal jong ka Union Christian College u Dr. R.M Manih u la ong ba bun na ki Principal jong ki Kolej ki la pynpaw ïa ki jingeh halor ka jingbym biang ki tiar ki tar namarba ka jingpynlong ïa kane ka eksamin kan long lyngba ki kor computer.
U la ong ba ka Sorkar Jylla ka la kular ban weng ïa kane ka jingeh da kaba buh ïa ki jaka thoh eksamin lane ki Examination Centres ha baroh ki District khnang ba ki samla pule kin ym duhnong.
U Principal jong ka Synod College u Dr. RM Lyngdoh u la pynpaw ba ka jingeh mynta kan long ïa ki samla pule kiba wan na ki thaiñ nongkyndong namarba kin hap ban pyndonkam ïa ka computer ha kane ka eksamin.
U Dr. Lyngdoh u la ong, watla katta ka University ka la rai ban pyntreikam beit shakhmat ïa ka CUET-2022.
Shuh shuh u la ong ba ki la ïoh ruh ka jingbthah ban pynsngewthuh ïa ki nonghikai bad ïa ki samla pule ha kaba ïadei bad ka jingpynlong ïa kane ka eksamin.
Ka NEHU ka la mynjur ban pdiang ïa ki samla pule na ka Under Graduate Courses lyngba ki College kiba ïateh bad ka hapoh ka jylla da kaba pynshong nongrim katkum ka jingïoh Marks ha ka CUET ïa kaba yn sa pynlong da ka National Testing Agency (NTA) shwa ban pynsdang ïa ka Academic Session ba thymmai jong u snem 2022-23.
Ka jingrejistar na ka bynta ka CUET ka la ïaid shakhmat bad ka tarik ba khatduh na ka bynta ki samla pule ban pyndep ïa ka jingpynrung kyrteng kan long ha ka 6 tarik, Jymmang, 2022.
Ki samla pule kiba kwah ban ïoh jaka pule ha ki Central University kin hap ban ïakhun shwa ïa kane ka eksamin.

Leave A Reply

Your email address will not be published.