Shillong, Nailar 27: Ka North East Football Development Council (NEFDC) ka dang pyrshang ban wad ïa ki lad ki lynti ban pynjanai bad kyntiew shuh shuh ïa ka jingïalehkai phutbol ha ka thaiñ Shatei Lam Mihngi ka Ri kaba kynthup ïa ka jingthmu ban pynlong ïa ka Inter-Club League bad ban pynthymmai ïa ka Dr T.Ao Football Tournament ha ki lympung ïakhun jong ka jylla.
Ïa kane ka mat la ïakren ha ka jingïalang jong ka NEFDC kaba long hynin ka janmiet sngi Nyngkong hapoh ka jingmaitphang da ka Meghalaya Football Association (MFA).
Ha kane ka jingïalang la donlang naduh u President ka Council, u Lalnghinglova Hmar, uba dei ruh ha kajuh ka por u Myntri ka tnad Sports and Youth Services ka Mizoram kum u nongpynïaid ïa ka jingïalang kaba la wan ban ïashimbynta da u General Secretary ka NEFDC Kipa Ajay, u Senior Vice-President Menla Ethenpa, u Vice-President Bah Hamletson Dohling (uba long ruh u President ka MFA), u Treasurer u Neibou Sekhose bad kiwei kiwei ki Executive Member.
Haba ïakren bad ki lad pathai khubor hadien ba la wai ka jingïalang, u Hmar ula ong, ba ka NEFDC kala wanrah lang ïa baroh ki jylla ka thaiñ Shatei Lam Mihngi ym ban ïakhun para ma ki hynrei ban ïarap mar kylliang lyngba ka jingïatreilang, ka jingïakren bad ban sam lang ïa ki jinghikai kiba paka, namar kidon ha ki kyrdan ki bapher bapher ha kaba ïadei bad ka jingkyntiew ïa ka phutbol.
“Ka don ka jingïalong shipara kaba wanrah lang ïa ngi ban kyntiew ïa kane ka jingïalehkai kaba itynnad ha ka thaiñ,” ula ong.
Ha kaba ïadei bad ka Dr T Ao Football Tournament na ka bynta ki kynhun jong ki jylla, u Hmar ula ong, ba ïa katei ka lympung ïakob ïalehkai la sdang da ka North Eastern Council (NEC) ha u snem 2009 hynrei kala sahteng noh naduh ba la wan ka khlam COVID-19. Ka NEFDC ka don jingthmu ban ïakren bad ka North Eastern Council bad ruh bad ka Ministry of Development of North Eastern Region (DoNER) jong ka sorkar pdeng ban sdang biang ïa kane ka lympung ïalehkai phutbol.
Ha kajuh ka por la rai ruh ban kyntu ïa ka All India Football Federation ba kan ai kyrteng ïa kawei na ki lympung ïalehkai kiba heh ha ka Ri ha utei u riewkhraw, u Dr. Talimeren Ao.
Ha kajuh ka por ka North East Football Development Council ka la jied ruh ïa ki nongkitkam ba thymmai na ka bynta ka samoi treikam jong u 2024-2028 kiba kynthup President – Lalnghinglova Hmar, General Secretary – Kipa Ajay, Senior Vice-President – Menla Ethenpa, Vice-President – Bah Hamletson Dohling bad u M Ratan Kr Singh.
Katba ïa ka shuki Treasurer la pynkhamti ha u Neibou Sekhose bad ïa ka kam Assistant General Secretary ha u Dr Sangrang Brahma. Ki Executive Member pat ki kynthup ïa u Amit Chaudhuri, Benel M Lamthiu, Gebin Kato, L Jyotirmoy Roy, Phurba Sherpa, Hiren Gogoi, Lalrengpuia, bad Bah Cliff Nongrum.
