Shillong, Ïaïong 16: Ka Meghalaya Industrial Development Corporation Ltd (MIDC) ha ka sngi Balang ka la rai ban weng bad ban pyndam noh ïa ka jingthmu ban shim jaka ha Umisang-Mawkdoh Ri Bhoi district na ka daw ba ki don ki bym pdiang satia kane ka jingthmu.
Ka jingthoh ba la pynmih da ka MIDC ka la pynshai ruh ba ka jingthmu sha lyndet kane ka jingithuh ïa kane ka jaka ha Umsiang-Mawkdoh ka long ba biang ban buh ïa ka industrial estate.
Kane ka jaka ka dei kaba marjan bad ka Electrinic City ka Assam, la ïohi ba ka dei ka lad ban buh ïa ka karkhana katkum ka juk kaba mynta ka dei ruh halor ka jingthmu ban wanrah ïa ka green and white category industry kaba dei ruh kaba ïahab bha ïa ka sawdong sawkun bad ka bym pynjaboh bad kaba ïaid lang bad ka Meghalaya ecology.
Ka jingthmu ban buh ïa kane ka karkhana ka long ban wanrah ka roi ka par, ka lad ïohkam ïohjam na ka bynta ki nongshong shnong bad ka ban ïoh synniang ruh ïa ka ïoh ka kot jong ka jylla.
Ka Corporation ka la dep ruh ban pynbna ïa ka Expression of Interest (EOI) ha ka 7 tarik u Lber, 2025, na ka bynta kane ka jingthmu bad la advertise ha ka English bad ki kot khubor Khasi ba mih manla ka sngi. Halor kane ki la don haduh 6 ngut ki nongdie kiba la shim bynta ha kane ka kam.
Shuh shuh ka Corporation ka la ïohpdiang ruh ïa bun bah ki jingkylli RTI na kiba bun ki sengbhalang.
“Katto kane ki jingïakren ki la mih kiba bakla bad kiba ïalam bakla ba la dep shim ïa ka jaka kaba ym dei satia ka jingshisha. Ki la don ruh ki kaiphod kiba la ïathuh ba ka Corporation ka la dep ruh ban pynlut T. 100 klur halor kane ka kam kaba ym dei ka jingshisha. Ka jingmang kaba la mynjur ha kaba sdang ka dei duna ïa ka 5% na katei ka pisa kaba la pynbna bakla,” ïathuh ka Corporation.
Shuh shuh ka MIDC ka la ong ba long kaba kloi ban wanrah ïa ka roi ka san jong ka jylla kaba neh.
“Katba ïa kane ka jingthmu ym lah shuh ban ïaid shakhmat ka Corporation kan pyrshang pat da kiwei ki lad ki lynti ban kyntiew ïa ka ïoh ka kot kaba neh ha ka jylla,” ka la bynrap.
