Shillong, Risaw 1 : Ka Sorkar Meghalaya bad Assam, ki la rai ban aiti noh sha ka Central Bureau of Investigation (CBI) ban tohkit ïa ka jingshah siat iap ki 5 ngut ki riew paidbah ha Mukroh, kaba jia ha ka 22 tarik Nawieng 2022.
ïa kane la pyntip da ki arngut ki Myntri Rangbah ka Assam Himanta Biswa Sarma bad Meghalaya Conrad K Sangma, haba ïakren bad ki lad pathai khubor hadien ka jingïalang ïakren pynbeit khappud ba long hynne ka sngi Saitjaiñ ha Guwahati.
U Himanta Biswa ula pyntip ba ki ar Sorkar ki la rai ruh ban pynduh noh ïa ki Judicial Inquiry Commission ba ki la thung namar ka jingshem ba kim poi shano shano ruh.
Halor ka jingtohkit CBI, u pyntip ba ki ar Sorkar kin sa kyrpad ïa kane ka kynhun tohkit ba kan ym register ïa ka case la ka dei ha Nongbah Shillong ne ha Guwahati hynrei ban register sha kiwei pat ki jaka ki bym don jingïashah liang.
U Himanta ula ong ba ka Judicial Inquiry ba la thung da ka Assam ne Meghalaya kam poi shaei shaei ruh namar ha ka jingtohkit ka Commission na Assam, la shem ba ki sakhi na Meghalaya kim wan satia shakhmat bad kumjuh ruh ka long ïa ka Commission na Meghalaya ha kaba ki sakhi na Assam kim leit mih satia.
Kumban shu pynkynmaw, ha ka 22 tarik Naiwieng 2022, 6 ngut ki briew ki la iap ba kynthup ïa uwei u Pulit Forest Guard ka Assam bad 5 ngut ki nong Mukroh ha ka jingther kuli ki Pulit Assam ha Mukroh.
