Rai ka kynhun Myntri ban ithuh kyrpang ïa baroh kiba don bynta ban wad ïa (L) Raja Raghuvanshi

Shillong, Jylliew 13: Ka kynhun Myntri ka sorkar jylla ha ka sngi Thohdieng ka la shim ka rai ban ithuh kum ka jingai burom ïa kiba bun ki agency, ki tnat sorkar kyrpang khamtam ïa ka kam ba la leh da ka tnat pulit ban khmih bad ban lap ïa ki sabut halor ka jingjia shah pynïap jong u nongwan jngohkai na Indore, Madhya Pradesh u (L) Raja Raghuvanshi, ha Sohra.
Haba kren sha ki lad pathai khubor u Nongaiktien ka sorkar MDA bad u Myntri ka sorkar jylla u Bah Paul Lyngdoh u la ong, “Ka kynhun Myntri ka la ithuh ba dei ban ai burom ïa ka bynta ba la shim da baroh ki nongshong shnong khamtam kito kiba don bynta hapoh ka kynhun pyllait im kiba la ïaid bad kiba la don ïalade ha Sohra la kumba 15 sngi ba la leit ne kham palat ïa kata.”
U la ïathuh ba ka kynhun Myntri kan sa leit ban kynduh ïa ki ophisar kum ka DGP bad ka kynhun jong ka kiba dei ki pulit ka East Khasi Hills khnang ban ai ka jingburom bad ithuh ïa ka bynta kaba khraw kaba ki la leh ban lap ïa ki sabut sakhi halor kane ka jingjia.
Tang hapoh ki 7 sngi, ka Special Investigation Team (SIT) ka la ïoh ban kem noh ïa ka kurim jong u Raja ka Sonam Raghuvanshi bad 4 ngut kiwei pat kiba donkti ha kane ka kam pynïap briew.
Haba ïadei bad kane ka kynhun pyllait im, u Bah Lyngdoh u la ong, “Nga hi dalade nga la dep ban ïakynduh ïa ki ha Sohra ha kine ki sngi ba ladep ha kaba nga la ai jingïarap pisa T. 15,000 sha manla iwei iwei kiba trei monsngewbha ha ryngkat bad ka jingai ïa ki syrnot.”
Ha kajuh ka por ka kynhun Myntri ka la pynpaw ruh ka jingsngewlem ïa baroh 290 ngut ki mynsiem kiba la khlad noh ha ka jingbthei bad hab ka Liengsuiñ Air India ha Ahmedabad.
“Ngi duwai na ka bynta kito baroh kiba la duh noh ïa la ki jong ki jingim bad kaba kynthup ïa kiba shong hapoh ka liengsuiñ kumjuh ruh ïa ki samla pule jong ka medical college ha kaba kane ka liengsuiñ ka la leit ban hiar,” ong u Bah Lyngdoh.