Rai ka Kynhun ki Sengbhalang Mawsynram C&RD Block ban leit pynkhih-win ha Secretariat

Mawsynram, ‘Nailur, 06: Ka Kynhun ki Sengbhalang jong ka Mawsynram C&RD Block (KSMC&RDB) kaba kynthup ïa ki san tylli ki Sengbhalang kata ka KSU, HANM, FKJGP, HYC bad HUAM mynta ka sngi ki la pynlong biang ïa ka jingïalang paidbah ban pynkhie im biang sa shisien ïa ka mat jingdawa, ba ka sorkar ka dei ban kyntiew noh ïa ka Mawsynram Community & Rural Development Block sha ka Civil Sub Division ha kaba ïa ka jingïalang la pynlong ha Ïew Mawsynram.
Ha kane ka sngi la ïadonlang naduh ki nongïalam ba hakhmat jong ki 5 tylli ki kynhun Sengbhalang haba ki la pynsawa ba ka jingdawa ka dei ban urlong bad ki maham ruh ba ki kyrtong jong kane ka elekshon 2023 kim dei ban shim kabu halor kane ka mat jingdawa ban long ka rynsan ïalap elekshon ha ki paidbah hynrei ki dei ban sngewthuh ba kane ka kam kam dei ka jingdawa tang jong uwei ne ar ngut hynrei ka dei jong u paidbah ba bun balang.
Ki la pynsngew ruh ba lada ka sorkar kam pyni dak ei ei halor kane ka jingdawa, kum ka Kynhun ki Sengbhalang kin sa leit ban mih bad ban pynkhih-win hakhmat Secretariat ban pynpaw shai ba ki thrang shisha ban pynïoh noh ïa ka Civil Sub Division ha kane ka dong ka thaiñ.
Lah ban kdew ïa ki jingshisha ba balei ka Kynhun ki Sengbhalang jong ka Mawsynram C&RD Block kaba kynthup ïa ka HANM, KSU, FKJGP, HYC & HUAM ki pynsawa jur halor kane ka mat jingdawa namar ba naduh u snem 1962 la pynlong ïa ka Mawsynram Block mynba ka dang don hapoh ka jingsynshar jong ka sorkar Assam bad la pynskhem pat hadien ba ki la ïoh la ka jong ka jylla ba pura bad mynta ka la kynjoh ha ka karta kaba 60 snem ei ei bad ka la ih bha ban ïoh ïa kane ka Civil Sub Division. La ïathuh ruh ba ki shnong kiba don hapoh jong ka ki long 164 tylli, ka jingdon jong ki nongshong shnong (population) ka long kumba 54 hajar tam, ka jingdon jong kiba lah nang thoh bad pule 58%, namar kata ka la dei kawei na ki Block ba la rim bha hapoh ka Jylla. Lada ym ai ïa ka Civil Sub Division, “Hato kam dei ba ka tarajur ka noh shilliang?” namar haduh mynta pat lah ban leh ei ei, ki la buh jingkylli.
Ki la ong shuh shuh ba ka Mawsynram C&RD Block ka long kaba la heh la san pura ha ka karta lada thew ïa ka ryngïeng rynïot bad ka la ih bha hynrei sngewbynñiaw ba ka dur jong ka, ka sah hi kumjuh khlem don jingkylla. Namarkata, kum ka Kynhun ka lah ban kynnoh ba dei ka jingbym kheiñ snep ne matlah jong ka sorkar khlem da phai khmat ne pynleit jingmut ban kyntiew ïa ka thaiñ Mawsynram bad ruh ïa ki jaka khappud kiba marjan jong ka.
Ki la bynrap ruh ba lada ïoh ïa ka Civil Sub Division kan pynsuk ha kiba bun bah ki kam bad kim da donkam shuh ban kiew haduh Shillong ban leh ïa ki Birth Certificate, Schedule Tribe Certificate, ki syrnod ban pynshisha (proof documents) kum ki riewlum ba shong ba sah hapoh ka jylla Meghalaya, ka kyrdan ba la bhah/mang kyrpang ba la pruid dak ha ka Constitution jong ka Ri India kane ka kyrdan kat haduh mynta mynne ka dang treikam la ha ka ïohkam ïohjam ka khaïi ka pateng kumta ter ter bad ha kaba ïa dei bad ka jingpynrung kyrteng ha ka electoral roll ne EPIC ïa kiba la kot sha ka karta 18 snem shaneng ne kiwei de ki jingdonkam.
Hadien ba kut ka jingïalang la ïoh ruh ban pynlong ïa ka ‘signature campaign’ ha kaba la ïoh ban ïashimbynta naduh ki nongïalam Sengbhalang, ki paidbah lem bad ki khynnah skul.
Ïa ka jingïalang la pynïaid da u bah Kyllang Thongni, Vice President ka HANM Central Body, ka jingmaitphang ïa ka jingïalang na u bah Bonsent Snaitang, President KSU Balat Border Area Circle. Kiwei pat ki nongkren ki long u Vincent Sangma na ki thaiñ Border, ka kong Batemon Kharbani na Sawsymper, u bah Tambor Risaw, President HYC, u bah Jai Skhemlon, Sordar Shnong Hatmawdon, u Kyrmen Shangdiar, President ka FKJGP South Eastern Zone bad ka jingkren khublei na u nongpynïaid ïa ka jinglang ha kaba ha kane ka sngi la ïadonlang ruh naduh u bah Olansing Suin, u kyrtong na ka UDP Mawsynram Constituency, u bah Daniel Wahlang, Aspirant Candidate jong ka BJP Mawsynram Constituency lem bad kiwei kiwei ki ‘riew rangbah.