Rai ka KAS ban buddien na ka MHA halor ka ktien Khasi

Shillong, Jymmang, 03: Ka jingïalang jong ka Khasi Author Society (KAS) ha ka sngi Baar ka la shim ïa ka rai ban buddien na ka Ministry of Home Affairs ka Sorkar India ha kaba ïadei bad ka jingdawa ban pynrung ïa ka ktien Khasi ha ka Khyrnit Baphra jong ka Riti Synshar ka Ri India.
Ka Ingdorbar Thawaiñ ka Jylla Meghalaya ha u Nailur, 2018 ka la mynjur ïa ka Resolution ban dawa ïa ka Sorkar India ba kan pynrung noh ïa ka Ktien Khasi bad Garo ha ka Khyrnit Baphra. Kane ka kam haduh mynta ka dang sah pohing hapoh ka Ministry of Home Affairs wat hapdeng ka jingbuddien jong ka Sorkar Jylla bad ka Khasi Author Society.
U President jong ka Society u Dr. DRL Nonglait ha ka jingïakren bad ki lad pathai khubor hadien ba la wai ka jingïalang u la ïathuh ba kane ka jingïalang da kawei ka sur ka la rai ban wad jingtip ruh na ka tnat Political jong ka Sorkar Jylla ha kaba ïadei bad kane ka jingdawa kaba la sah pongding da ki snem.
“Shen ngin sa ïakynduh ïa u Myntri Rangbah ka Jylla u Conrad Kongkal Sangma bad ïa u Myntri uba peit ïa ka tnat Political na ka bynta ban kyntu ïa ka Sorkar Jylla ba kan buddien na ka Ministry of Home Affairs ha kaba ïadei bad ka jingdawa ban pynrung ïa ka Ktien Khasi ha ka Khyrnit Baphra jong ka Riti Synshar ka Ri India,” ong u Dr. Nonglait.
U Dr. Nonglait u la ïathuh ba ka KAS ka la jied ruh hynriew ngut ki Scholar bad ki Researchers ba kin pynkhreh ha kaba lum thup halor ka Ktien Khasi kaba ïadei bad ka Drama, ka Literature, ka Arts, ka Music bad kiwei kiwei.
U la bynrap ba kane ka jingbuh jingthoh kan ïarap ïa ka Ktien Khasi ban kham paw shuh shuh ha kaba ïadei bad kane ka jingdawa ban pynrung ïa ka Ktien Khasi ha ka Khyrnit Baphra.
U la ïathuh ruh ba ka Society kan sa pynkhreh ïa ka Dienshonhi ha ka Ktien Khasi kaba batai ïa ki jingmut jong ki kyntien Khasi bad ïa kane ka projek la buh thong ban pyndep hapoh lai snem.
U la bynrap ba kane ka Dienshonhi kan ïarap ïa ki samla pule, ïa ki riewpaidbah bad ïa ki pateng ki ban sa wan ba kin dup kham tip bniah shuh shuh halor ka jingpyndonkam ïa ka Ktien Khasi ha ka thoh ka pule.
Ha kawei pat ka liang, ka Khasi Author Society (KAS) ka la rai ban bteng ïa ka jingpynkup burom da kaba ïa ka ‘KAS Award’ na ka bynta ki khynnah skul kiba ïoh heh Marks ha ka Sobjek Khasi ha ka Class-X bad ka BA (Hons) ha ka Sobjek Khasi.
Ka KAS ka la pynlong ïa kane ka jingïalang hadien ka jingsahteng ki kam na ka jingwan lynshop jong ka khlam jingpang COVID-19 bad jied ruh ia ki nongkitkam na ka bynta ka samoi treikam jong u snem 2022-2025.
Ha kane ka jingïalang, u Dr. DRL Nonglait u la shah bynshet ban dang ïai bteng kum u President ka Society, u Dr. KD Ramsiej kum u Vice President, u Dr. RP Kharshiing kum u General Secretary, u Dr. MM Khymdeit kum u Joint Secretary bad P. Kharshiiing kum Fnance Secretary, Treasurer Dr. Barika Khyriem, Secretary Publication Committee Dr. RS Wankhar, Editor Dr. Thomlin Lynshing, bad ki dkhot ka CEC ki long Prof. B. War, Prof. S. Dkhar, Prof. Desmond L. Kharmawphlang, Dr. Fabian Lyngdoh, Dr. EJE Shongwan.