Jowai, Nailar 21: Ka Dorbar Shnong jong ka Shnong Lapangap mynta ka sngi kala shim ïa ka jingïalang paidbah, hadien ba la mih ka jingjia ïa klumar haka 18 tarik u Nailar, 2023 na ka jingwan pynjulor u paid Karbi ïaki tynrai deiñ kiba dang shu dep thung hapoh ka shnong Lapangap lyngba ka tnad Basin Development .
Halor kane ka Dorbar Shnong kala lum ïa kane ka jingïalang mynta ka sngi 21 tarik da kaba ïamih paidbah ban ïakren sani bha halor kane ka jingeh kaba ki mad na ka por sha ka por, na ka liang ka Dorbar Shnong ryngkat bad ki para marjan Shnong kila shim ruh ïa ka rai kata naduh mynta ka sngi kin pyni ka jingtylli da kawei ka bor lada kitei ki paid Karbi ki dang bteng ban wan lehbor ha ki jaka ki puta jong ka shnong Lapangap.
Ha ka juh ka por kila shim ruh ïa ka rai naduh mynta ka sngi kin khang noh ïa ka rung ka mih hapeng kine ki ar jait bynriew Karbi bad ki Pnar, da kaba ym shah shuh ban ïa khaïi pateng hapdeng jong ki.
U Waheh Shnong ma Deimonmi Lyngdoh ha ka jingkren lyngba ka phone ula ong la pynlong ïa kane ka jingïalang namar ka jingïai bteng ki paid Karbi ban wan pynklumar ïa ki paid Pnar manla ki por hapoh ka shnong bad ka shnong kala pynrem jur ïa kitei ki Pulit Assam kiba ïadon bynta ban synran lang ïa ki paid Karbi.
Shuh shuh ula ong kiwei de ki shnong khappud kum ka shnong Khanduli, Kseh Ryngshang, Deinler (Labang Nongphyllut) bad kiwei de kila wan sha kane ka jingïalang da kawei ka jingmut ban ïatreilang nangne shakhmat ban pyni bor ïa ki Karbi.
