Rai ka BJP ban ïakhun hi marwei ha ka elekshon shiteng samoi na Gambegre Assembly seat

Shillong, Naitung 08: Ka seng Bharatiya Janata Party (BJP) ka la rai ban ïakhun ïa kane ka elekshon shiteng samoi napoh ka Gambegre Assembly seat.
Haba ïathuh shaphang kane ha ka sngi nyngkong, u BJP state president u Rikman G Momin u la ong, “Haoid nga lah dep ban pyntip sha ki nongïalam ka sengkmie bad ki la mynjur hynrei namarba mynta ki la don katto katne ki jingkylla kumta ngap ban kyrpad biang ïa ki hynrei kumba 100% ngin ïakhun beit ïa kane ka elekshon shiteng samoi.”
Haba kylli la ka party kan pynïeng da u State vice president bad u MDC ka Tura u Bernard N Marak kum u kyrtong ka seng BJP, u Momin ha kawei ka liang u la ong, “Ngim shim la rai satia halor u kyrtong hynrei u Bernard ruh kumjuh u la trei shitom na ka bynta ka party bad kumba dei ban long, u dei ban ïoh ïa ka tiket.”
U la ong ruh ba ka BJP ka la rai ban ïakhun marwei ïa ka elekshon na Gambegre bad kam don kano kano ka jingthmu ban pan ka jingkyrshan na ka National People’s Party (NPP).
“Em, namarba ngi mut ban ïakhun kumta ngim donkam ïa ka jingkyrshan ka jong ki. Ngi dei ka seng kaba pher, namarba ki don bynta bad ka NDA, ngi burom ïa u Myntri Rangbah duh ka ri kumta ngi kyrshan ïa ka NPP ha kane ka elekshon MP ba dang shu dep,” u la ong.
U Momin u la kyntait ruh ïa ka jingkheiñ ba da kaba ai ka jingkyrshan ïa ka NPP, ka jingïoh vote ka BJP ka la shah ktah.
Shuh shuh u BJP state president u la kynnoh ruh ba kam shym la don kano kano ka kam pynroi hapoh Gambegre constituency, kaba la mihkhmat da u MLA barim bad mynta u MP ka Tura u Saleng A Sangma, ha kine ki 15 snem ba la leit.
“Kam shym la don satia kano kano ka kam pynroi ha baroh ki liang la ka dei ïa ki surok, ki skul, bad kiwei,” u la ong.
Ha kawei pat ka liang u Nongai ktien ka BJP u Bah M Kharkrang u la ong, “Ngi la kwah ban ïakhun hi marwei wat ha ka elekshon MP hynrei namarba ka don ka jingbthah napoh ki nongïalam ka sengkmie ka BJP bad kumta ngi hap ban mynjur ïa kane ka rai.”
Haba ïadei bad ka jingdawa ban wengnoh ïa u Momin kum u BJP president, u Bah Kharkrang u la ong ba kam shym la don kano kano ka jingïapait hapoh ka parti, ki don katto katne ki briew ki bym sngewbha bad ka party bad kidei kine kiba shna ïa kine ki khana.