Rai ban pynkhlain ka jingïatreilang, ka DREAM, Pulit bad ki dkhot ka VDP ban pynduh jait ïa ki jingsniew

Shillong, Rymphang 11: Ka Drug Reduction, Elimination & Action Mission (DREAM) ka la lum ïa ka jingiïalang bad ki Village Defence Parties (VDP) jong ka nongbah Shillong ban pynkhlain ïa ki jingpyrshang ban pynduh jait ïa u drok.
Ha kane ka jingïalang ka la pynleit jingmut ha kaba pynduh jait ïa ki jingdih ba sniew kum na u drok bad ban kyntiew ïa ka imlang sahlang.
“Ka bynta jong ki VDP ka long kaba kongsan ha kaban ïarap ïa ka jingpyrshang jong ki Pulit Meghalaya ha kaba ïadei bad ka jingpynduh jait ïa u drok,” ong u Director ka Mission u Bah Francis Kharshiing ha ka kyrwoh khubor.
Ka jingïalang ka la pynpaw ruh ïa ka jingdonkam kaba kongsan ban shna noh ïa ki (halfway homes) ïing kiba shiteng lynti hapoh ki dong bad kyntoit kum ka bynta ba kongsan jong ka jingkyrshan hadien ba kila ïoh ka jingkoit pat ban ïada na ka jingshah pynngop biang jong ki briew hapdeng ki briew kiba la koit.
“La pynsngew thuh ruh ïa ki dkhot jong ka VDP halor ka bynta ba kongsan jong ki ha kaba ïatreilang bad ki Dorbar Shnong bad ban ïarap ïa ki jingeh jong ki paidbah ban pynsuk ïa ka jingai ïa ki No Objection Certificate (NOC) na ka bynta kum kine ki jaka,” ong u Kharshiing da kaba bynrap “Shuh shuh, la pynpaw lypa ïa ka jingdonkam jong ka vocational training ka ban long ku kawei na ki lad ban ïada bad ruh ban pynioh ruh ka kamai kajih bad ban pynduna ka jingdih ba sniew.”
Ha kane ka jingialang la ïoh ruh ïa ka jingkren na u Inspector E Lamare uba dei u OC ka Madanrynting Police Station bad u Insp N Koch uba dei u OC ka ANTF Police Station.
dkhot ka VDP kiba la wan ban ïa shim bynta ha kane ka jingialang ki kynthup na ka shnong Lawsohtun, Lumparing, Madanrynting, Demthring, Mawlai Iew-Rynghep, Lapalang, Nongthymmai, Mawlynrei Nongkrem, Mawlai Umjaiur, Umpling, Smit Pyllun, Nongrah, nalor kiwei kiwei, ki la ïashim bynta shit rhem ha ka jingïakren.
Ïa jingïalang la pynkut da ka jingkut jingmut ban pynkhlain ïa ka jingïatreilang kaba khlaiñ hapdeng ka DREAM, ki Pulit Meghalaya, bad ki VDP ban tei ïa ki shnong kaba kham shngaiñ, kiba koit ba khiah bad ban pynskhem ïa ka jingangnud jong ka Jylla ban ïakhun pyrshah ïa ka jingdih buaid.