Shillong, Jymmang 31: Ka long ka jingsngew sarong ïa ka ri Khasi bad ïa ka jylla Meghaya hi baroh kawei ha kaba u samla Kisan Bareh uwei na ki nongïalehkai Martial Arts u la khur ïa ka nam lahduh da kaba ïoh rah ïa ka Champion Belt ha ka lympung ïakura National MMA Championship.
Ïa kane ka lympung la pynlong da ka Chainaba, The Cage Fight MFL-5 ha ryngkat ka Mixed Martial Arts Federation of India kaba la pynlong ha Imphal, Manipur ha ka 28 tarik Jymmang 2022. Nalor u Kisan Bareh ki don sa lai ngut ki nongïakura ba kynthup iwei ki samla kynthei ki la khur takma ksiar bad takma rupa.
Kine ki kynthup ïa u Juh Pa u Juh Nongtdu u khur takma ksiar, u Fivestar Bareh ïa ka takma rupa bad ka samla Daniella I Wanda Mylliemngap kaba ïoh khur ïa ka takma rupa. Baroh kine ki saw ngut ki nongïakura kidei na ka kynhun Revolution MMA Shillong.
