Shillong, Jylliew, 20: Ki samla thep kam na ki district bapher bapher jong ka jylla Meghalaya kiba la dap da ka jingbitar halor ka jingpynsangeh ka tnat shipai India ïa ka Common Entrance Examination (CEE) mynta la shi snem kynthih ha ka Lah Sngi U Blei ki la mih sha surok ban pynsngew sha ki bor Sorkar ban tuklar lem halor kane ka jingeh jong ki.
Ki samla thep kam shipai kiba la shah jied ban thoh ïa ka eksamin CEE hadien ba la pyndep ïa ka jingmareh ki la ïalum ha Rhino Point, Shillong da kaba rah ïa ki plakad bad hadien kane katba ki dang ïaid paidbah ynda la poi ha IGP Point ki la shah pynsangeh ha ki bor Pulit.
Hadien ka jingïakren bad ki Majistor, ïa kine ki samla la bthah ba kin shong noh hakhmat u motdur jong u Kiang Nangbah, hajan ka Shillong Civil Hospital.
Kine ki samla kiba dap da ka jingbitar ïa ka jingpynslem ka tnat Shipai ban pynlong ïa ka eksamin ki la pyrta shla da ka sur ba dawa, “ngi kwah ïa ka hok’ ha shilynter lynti.
“Ngi wan hangne ban kylli hadien ba ngi la ïohi ba la pyndam ïa ka eksamin CEE. Ngi wan hangne tang ka met bad ka mynsiem bad ka khubor kaba ngi ïoh mynta ka dei beit kaba la pynthikna ba la pyndam (ïa ka ekamin CEE). Ka jingpyndam ïa ka eksamin kam long kaba shong nongrim bad lada ki don ïa ka hok ban pynduh ïa ngi nalor ba ki ladep pynlong ïa ki rally mareh ha ki snem kiba ladep hynrei ki pynmih man ïa ka khubor ba la pyndam,” ong uwei na ki samla thep kam.
U la buh jingkylli, “hato ka jingthylli jong ka post kaba lait kaba ki ladep pynbna ki buh shaei? Ngi wan ban pyrshah bad ngim lah ban pdiang ïa kata bad ngi kyrmen ba ki paidbah kin ai jingkyrshan lem ïa ngi bad ngi kyrpad ïa ki Nongmihkhmat ba kin shimkhia ïa kane ka jingdawa bad phin dawa ïa ka hok jong ngi bad ngi dei ban ïoh thoh eksamin bad ban ïoh rungkam ha ka tnat shipai.”
Haba kylli, uwei pat na ki nongthep kam shipai, u la ong, “naduh ka 30 tarik, Jymmang, ki (bor shipai) la shu pynsangeh tad haduh u bnai Risaw bad ha ka 23 tarik, Nohprah. 2021 ka wan ka shithi ba la shah jied shipor bad sngewbha wan ban pynshisha ïa ki kot ki sla. Ynda ngi la wan bad ngi la pynlut ki phew hajar ma ngi kiba sah shane (Shillong) tang ban leit sha distrik lajong. Kumno pat mynta ki pynsangeh noh. Ngim sngew ïahap ïa kata bad ngi dawa ba ka Sorkar ka dei ban tuklar lem.”
Katkum ka jingïathuh jong une u samla, tang na East Jaiñtia Hills ki don haduh 63 ngut ki samla ba la thep ïa ka kam ha ka tnat shipai. Na West Jaiñtia Hills ki don 123 ngut khlem da kheiñ lang ïa kiwei kiwei pat ki distrik.
