Rah nam lahduh ka OM Roy Memorial HSS

Shillong, Risaw 08: Ka OM Roy Memorial Higher Secondary School, Mawlai Kynton Massar ka la ïoh ban rah ïa ka nam lahduh ha ka lympung phutbol kaba la tip da ka ‘10th Inter School Knock Out Tournament 2025’ hadien ba ka la pynliem kput haduh 7-0 kol ïa ka Mawlai Presbyterian Higher Secondary School, Iewrynghep ha ka final kaba la long ha ka 07 tarik Risaw, ha Madan Heh mini stadium, Mawlai Phudmuri.
ïa kane ka lympung kaba la sdang naduh ka 19 tarik Nailur, 2025, la pynïaid da ka Federation of Khasi Jaintia and Garo People (FKJGP), Mawlai Circle, bad ki la don haduh 14 tylli ki skul kiba la ïa shim bynta.
Haba phai sha ka jingïakhun, ki khynnah ïalehkai jong ka OM Roy ki la pynskhem ïa ka jingjop naduh ka kylla step, da kaba thep 5 kol bad bynrap sa ar tylli ha ka kylla miet ban pynkut ïa ka jingïalehkai.
U Jonathan Kharbani, uba la ïoh ban thep hattrik ha ka final, u la ïoh khur ruh ïa ka khusnam Top Scorer da kaba pynkhihjar 10 tylli ki kol ha kane ka lympung.
Nalor u Jonathan, ki don sa arngut ki rangïalehkai ka Om Roy kiba la khur ïa ki khusnam shimet, ha kaba u Lumlangki Shangpliang u la ïoh ïa ka nam Best Goalkeeper, nangta u Eveneser Sun ïaka nam Best Player.
Ka khusnam Promising Player ka la leit sha u Damebandon Mawkhroh, ka Sacred Heart Boys Higher Secondary School, Mawlai, nangta ka Bethesda School (Mawïong) ka la khur ïa ka Best Dicipline Team.
Ha kane ka sngi la wan Kongsan da u Bah Dundee C. Khongsit, President ka FKJGP Sengkmie, ha kaba u la pyrto ïa ki nonghikai kiba la trei shitom ban hikai ïa ki khynnah, la ka dei ha ki jingpule ne ha ka Sports, da kaba kdew ba ka jaitbynriew kaba pynlut por ïa ki khynnah samla ka dei ka jaitbynriew kaba don ïa ka lawei bad kaba don ïa ka jingkyrmen.
Katba na ka liang u bah Eldie N. Lyngdoh, General Secretary kum symbud kongsan u la ïaroh ïa ka FKJGP Mawlai Circle kaba la pynlong ïa kane ka lympung da kaba pynpaw ba kam long kaba suk ban pynlong ïa ka lympung kaba la kynjoh mynta sha ka sienjam kaba 10.
Ha kane ka sngi la ïa don lang u Bah Khrawkupar Nongsiej, President FKJGP Mawlai, Bah Varzelinno Lyngdoh, secretary, ki dkhot ka FKJGP, ka KSU Mawlai Circle, ki nonghikai ki khynnah skul bad kiwei kiwei.
Hashuwa ban pynlong ïa ka final ka la don ka jingïalehkai paralok, ha kaba ka FKJGP North Khasi Hills ka la jop da 5-2 ïa ka FKJGP Mawlai.