Jowai, Nohprah 15: Ka kynhun ïalehkai jong ka Nangbah Mulang kala long syndon ka lahduh haka ‘Super Division Football Tournament – 2024’ ïa kaba la tip kum ka “U Kiang Nangbah Memorial Trophy” bala pynïaid da ka West Jaiñtia District Sports Association, (WJDSA) Jowai kaba la long ha ka 14 tarik Nohprah (sngi saitjaiñ), 2024 ha madan Kiang Nangbah Stadium, Dongmihsngi Jowai.
Haba phai sha ka jingïakhun Final mynta ka sngi hapdeng Nangbah Mulang pyrshah ïa ka Demthring SC, kala long shisha kaba ïakhaid bor bha bad ka la long ruh kaba itynnad bha ka rukom ïalehkai kaba la pynhun ïa ki nongwan peitkai.
Hynrei dei ha ka kylla step jong ka jingïakhun ka kynhun jong ka Nangbah Mulang kala ïoh ban thep ïa ka shikol lyngba u rang ïalehkai jong ka u Timmy Ryngkhlem kata haka minit kaba 12. Hynrei na ka liang ka Demthring SC kala pyrshang ban pynphai kylla ïa katei ka shikol naduh k a kylla step haduh jong ka kylla miet kam shem la ïoh lad satai bad haduh ba kut jong ka jingïakhun ka Nangbah Mulang kala jop da 1-0 kol ïa ka Demthring bad rah syndon ïa ka nam lahduh mynta u snem.
Ïa ka nam Top Scorer la ïoh da u Niponghi Sumer na ka Nangbah Mulang uba la ïoh ban thep hadih 9 kol, Best Goalkeeper la ïoh da u Ialamlang Biam na ka Ladthadlaboh SC, Man of the Match la ïoh da u Timmy Ryngkhlem naka Nangbah Mulang, katba ïa ka nam Player of the Tournament la ïoh da u Wadshwa Lato na ka Demthring SC.
Ïa ki khusnam sha ki nongjop la sam da u kongsan jong kane ka sngi u ma Wailadmiki Shylla MLA ka Jowai, ha ryngkat ka jingdonlang u DSO ma K. Passah, ki nongkitkam ka WJDSA nalor kiwei de.
Mynta ka sngi ka WJDSA ka la pynkup burom ruh ïa ki ar ngut ki referee kiba kynthup ïa u Sebastian Suting uba la pyndep ïa ka National Referee (Panel B) 2024 Basketball Federation of India bad ïa u Bulmi Phawa, uba la pyndep ïa ka National Referee (Level 5) 2024, All India Football Federation.
